Uxue Alberdiri elkarrizketa, gaurko 'Sautrela'n

Uxue Alberdi elkarrizketatuko du Hasier Etxeberriak, gaur, 15:00etan, 'Sautrela' saioan. Gainera, literaturan dabiltzan gazteekin solasean ere arituko dira Hasier Etxeberriak gidatuta, aste honetan, ETB1eko literatur tartean.

Euskal literaturan, bere biziraupen eta garapenaren aldeko borroka horretan, beti egon da belaunaldi berriekiko kezka. Ba al dator literaturara emana bizi den gazterik? Emariak ba al du segidarik? Garai hipermoderno hauetan, geratzen al da gazte jendearen artean literatur amorraturik? Gazte eta berde zela ipini zuen martxan Bernardo Atxagak Pott Banda, antzera etorri ziren geroago Lubaki Banda, Vladimir Brigada eta beste. Baina, egun, ba al dago orduko mugimenduen lakorik? Galdera horiei eta beste zenbaiti erantzungo diete aste honetako 'Sautrela' saioan (larunbatean, 15:00etan).

Horretarako, norekin eta literaturgintzan dabiltzan gazteenekin egingo dute hitzordua: alde batetik, Obabako Testiguekin, irakurle talde eta irratsaio bana antolatzen duten Añorgako gazteekin, eta bestetik, Elearazi blogeko Danele Sarriugarterekin, zeinak, aipatu blogeko partaidetako bat izateaz gain, 2012an Igartza saria irabazi baitzuen. Horietaz eta beste literaturazale gazteez –tartean, berriki osatu den Itu Bandaz– hitz egingo dute.

Elkarrizketaren atalean, orain gutxi argitaratu den ipuin liburu bati buruz jardungo dira Uxue Alberdirekin, Euli-giro liburuari buruz. Honakoa du bere bigarren ipuin liburua, estreinako Aulki bat elurretan hura ondoren. Alberdi ezaguna da idazle ez ezik –nobela bat ere badu argitaratua, Aulki jokoa– bertsolaria ere badelako, eta obra berri honi buruzko xehetasunak emango ditu larunbateko saioan.

Beñat Sarasolak, aldiz, bere atzera begirakoan, beste ipuin liburu bat ekarriko du, Martin Ugalderen Hiltzaileak. Ipuin liburu gogoangarria, euskal literaturako narratiba modernitatera eraman ei zuena.

'Sautrela' gaur emitituko da, 15:00etatik aurrera, ETB1en.