Javier Aramendi bere lehenengo poema liburuaz, gaur, 'Sautrela'n

Gaur 'Sautrela' saioak autore berri bat ezagutuko du, Javier Aramendi. Badira gaztetako beroaldiak jota lehen aldiz argitaratzen duten idazleak. Horietako ugarik poesian ematen dituzte lehen urratsak. Badira, halaber, bizitzak urte luzez emandako eskarmentuaz baliaturik nagusitxo direla publikatzen dutenak beren opera prima. Azken multzo honetakoa dugu Javier Aramendi. Aurretik han hemenka aldizkari literarioetan aleren bat argitara eman izan badu ere, Erein etxearekin atera berri zuen Verba polita poema liburua du bere lehen obra. Poema liburu jostaria inondik ere, izenburuak berak aditzera ematen digunez. Poemategi zabala da gai eta estiloz, umoretik nahiz hotsanditik duena, eta bere idazteko moduaz eta jarreraz arituko da Hasier Etxeberriarekin mantenduko duen hitzorduan zehar.

'Sautrela'k, gainera, erreportaje berri bat eskainiko du Francis Scott Fitzgerald idazle estatubatuarraren inguruan. XX. mendeko idazle estatubatuar handienetakoa da Fitzgerald, eta euskaraz ere, bere nobela famatuenak irakurtzeko aukera dago, Gatsby handia, Xabier Olarrak itzuli eta Igela argitaletxeak plazaratua. Alabaina, ipuingile aparta zen orobat Fitzgerald. Garaiko hainbat aldizkaritan eman zituen ipuinok argitara, bizibidea ateratzeko balio ziotenak. Berriki argitaratu du Elkarrek Fitzgeralden ipuinen antologia bat, Plazeren gau ilunekoak, Garazi Arrulak eta Iñigo Roquek itzuli eta prestatua. Horren aitzakian, Fitzgerald ipuingileari buruz gehiago jakin nahi izan dugu.

Azkenik, saioaren bukaeran, Beñat Sarasola Jokin Muñozen lehen nobelaz, Joan zaretenean-ez, jardungo da. Gerora Muñoz gure literaturako narratzaile handienetakoa bilakatuko bazen ere, oraindik ia idazle hasiberria zen 1997an liburua argitaratu zuenean.

'Sautrela' gaur izango da ikusgai, 15:00etatik aurrera, ETB1en.