Akaroei eta mikrobioei buruz, 'Teknopolis' saioan

Akaroak hobeto ezagutzeko aukera izango dugu asteburu honetan 'Teknopolis' saioan. Ez ditugu ikusten, txiki-txikiak direlako, horrexegatik haien itxura ez da oso ezaguna. Baina mikroskopioarekin begiratuta ederki ikusten dira. Akaroak dira, eta munstro-itxura dute batzuek. Zirrara eragiten du pentsatzeak gurekin bizi direla, gure azalean bertan ere bai. Ezagunak ditugu alergiak eragiten dituztelako.

Are txikiagoak dira mikrobioak, eta gorputzean bertan zenbat-gura ditugu: gutxi gorabehera mikrobio bat gorputzeko zelula bakoitzeko. Gehienak hesteetan daude eta gure osasunaren adierazle onak dira. Ignacio Lopez-Goñi Mikrobiologia katedradunak hala dio bere liburu berrian, eta 'Teknopolis'en dibulgatzaile nafarra elkarrizketatu dute bere gai maitearen gainean: mikrobiota.

'Teknopolis' 13:30ean dago ikusgai larunbatean ETB1en eta igandean ETB2n, baita eitb.eus atarian ere.