Zuek hor
Oporren ondoren...
Bueltan dira umorea eta musika, gaur gauean, 'Zuek hor!!' saioarekin
EITB
Itziar Atienza eta Manu Maritxalar izango dituzte gonbidatu aste honetako saioan. Aitor Gabilondok hartuko du saioaren gidaritza, eta Estepan Aldamiz-Etxebarria galderak egitera dator.
Bideoak (2)
Informazio gehiago (1)
Aste Santuko oporren ostean, bueltan dira umorea, musika eta entretenimentua ETB1en 'Zuek Hor!!' saioarekin. Gaur gauean, Itziar Atienza eta Manu Maritxalar izango dituzte gonbidatu, eta Estepan Aldamiz-Etxebarria etorriko da horiei galderak egitera.
Izan ere, Aitor Gabilondoren saioko gidari berriaren baimenarekin, elkarrizketatzaile lanetan eskarmentu handia duen pertsona batek hartuko du astero gonbidatuei galderak egiteko ardura. Aste honetan, esan bezala, Euskal Telebistaren sorreratik telebistan lanean dabilen Estepan Aldamiz-Etxebarria izango da galderak egiteko garaian aginte-makila hartuko duena.
Estreinatu berri den Txarriboda filmeko protagonista, Itziar Atienza aktorea, eta 'El Conquistador del fin del Mundo' saioko kapitainetako bat, Manu Maritxalar, eseriko dira aste honetan sofa laranjan, Estepanen galderei erantzuteko.
Itziar Atienza Madrilen jaio zen, baina galdakoztarra da. Zuzenbidean lizentziatu zen 2000. urtean, eta abokatu lanetan urte batzuk igaro ondoren, aktore izateko hautua egin zuen. Ordutik, 'Vaya Semanita', 'Irrikitown' eta 'Bi eta Bat' telebista saioetan ikusi dugu, baita Bypass filmean ere. Aste honetan bertan estreinatu berri den Txarriboda filmean protagonista lanak egin ditu.
Manu Maritxalar oreretarra 'El Conquistador del Fin del Mundo' saioko kapitaina da azken urteotan. Arraunlari eta boxeolari ohia 'Boxeo Izarrak' saioko aurkezlea da gaur egun, Pedro Mari Goikoetxearekin batera.
Elkarrizketaz gainera, ETB1eko saioan izango dira, nola ez, Andoitz eta Gorane haurrak, La Jaio txoni poligonera, Ingalaterrako erregina eta bere seme belarriluzea, Torreviejako gizonak, Desfass orkestra... Denen artean, saio umoretsua egitea izango dute helburu.
Aitzol Barandiaran bertsolariak biribilduko du saioa, elkarrizketan zehar gonbidatuek aitortu dituzten bitxikeriekin bertso-bertsio musikatua egingo baitu zuzenean Zukutu Band taldearen ezinbesteko laguntzarekin.
'Zuek Hor!!' gaur izango da ikusgai, 22:30etik aurrera, ETB1en.
