Albisteak
Tres Sesenta jaialdia
Iruñea prest dago Belako, Berri Txarrak eta Ken Zazpi hartzeko
Ostiralean eta larunbatean egingo dute Tres Sesenta jaialdia Zitadelan, eta, talde horiez gain, La M.O.D.A., Maga, Grises eta Xoel Lopez arituko dira bertan.
-
Berri Txarrak
Nafarroako hiriburuko urteko musika hitzordu garrantzitsuenetakoa heltzear dago. Tres Sesenta jaialdiak ostiralean, ekainaren 10ean, irekiko ditu ateak, eta bi egunez musika onenaren agertoki bihurtuko da Zitadela. Handik igaroko dira, besteak beste, Berri Txarrak, Belako eta Ken Zazpi euskal taldeak.
Gainera, apustu berriekin iritsiko da jaialdia. Izan ere, musika ez ezik, gastronomia ere sustatu nahi dute antolatzaileek bosgarren edizio honetan. Hala, tokiko produktuei gordetako leku bat jarriko dute Zitadelan. Halaber, aipatu eremutik kanpo ere zabalduko da musika, Alde Zaharrean hainbat kontzertu egongo baitira.
Disko-jartzaileen saioak
Berritasunik ere izango du aurten festibalak, kontzertuak bukatutakoan disko-jartzaileen saioak nagusituko baitira Zitadelan, 02:00etatik 04:00etara.
Tres Sesenta Club agertokian izango dira saioak, eta jaialdiko sarrerekin doan sartzeko aukera izango dute ikusleek. Sarrerarik ez dutenentzat, aitzitik, 5 euroan egongo dira salgai txartelak, Zitadelan bertan.
Kontzertuen ordutegiak
Ekainak 10, ostirala
20:00, Monte del Oso
21:00, Ciclonautas
22:00, La M.O.D.A.
23:10, Belako
00:30, Berri Txarrak
02:00, Dj Göo
Ekainak 11, larunbata
19:30, Baobabs will destroy your planet
20:15, Maga
21:30, Grises
22:45, Ken Zazpi
00:20, Xoel López
02:00, Edu AnMu dj
Sarrerak
Bi eguneko bonuak 30 euroan daude eskuragarri (+ banaketa gastuak). Egun bakarreko sarrerek, berriz, 20 euroko prezioa dute.
Txarteldegian, 35 euroko salneurria izango dute bonuek, eta 25 eurokoa, eguneko sarrerek.