Ostiralean helduko da Rural Zombies taldearen disko berria

Estudioko bigarren proiektuari azken zertzeladak eman ostean, Rural Zombies taldeak prest du disko berria. From home to Hospital St. lana ostiral honetan, urtarrilaren 26an, argitaratuko dute, eta, aurreikusitakoaren arabera, asmo handiko ekoizpena da zestoarrek esku artean dutena. Eñaut Gaztañagaren eskuetan jarri ziren, lan berria grabatzeko.

Dirudienez, gitarrek berebiziko indarra dute diskoan, betiere taldeak duen berezko ukitu malenkoniatsuari eutsita eta Julia Urreagaren ahots indartsua lagun. Indar hori nabarmena da "Bi" aurrerapen-kantuan ere. Lan berria Mushroom Pillow diskoetxearen eskutik helduko da.

Kontzertuak

Urte bukaeran agertokiz agertoki ibili ziren Rural Zombies taldekoak, eta litekeena da aurki oholtza gainean ikustea, berriro ere. Dena dela, oraindik ez dute 2018ko bira iragarri; bai, ostera, ekainean eskainiko duten emanaldi baten berri eman. Hain zuzen ere, Palencia Sonora ekainaren 7tik 10era egingo duten jaialdian arituko dira.

Diskoaren azala