Albisteak
Maiatzaren 12an
Izaro, Inun, Maren eta Keu, LemoaKustik Fest jaialdian
LUZIA ZUGADI | EITB.EUS
Larunbat honetan Lemoan egingo duten festan Ekiza eta Liv Wallace ere arituko dira. Gainera, food truck zerbitzua eta garagardo dastatzea egongo da egun osoan zehar.
Musika, artea, garagardoa eta janaria izango ditu ardatz Lemoan datorren astean egingo duten LemoaKustik Fest jaialdiak. Osagarri apartak, beraz, larunbata giro ezin hobean igarotzeko.
Taula gainekoei helduta, egun osoan zehar egingo dituzte kontzertuak, aipatu udalerriko leku ezberdinetan. 10:00ak aldera hasiko da, hain zuzen, Ekizaren zuzenekoa Anbulatorio plazan; 12:00etan, Maren kantari gernikarrak irekiko du Eskolako aterpeko emanaldi zikloa, eta Liv Wallace igoko da gero oholtzara.
Arratsalderako gorde dituzte Inunen eta Keuren hitzorduak, eta plater nagusia 22:00etarako iragarri dute. Ordu horretan, Izaro aterako da kiroldegiko agertokira.
Esan bezala, food truck zerbitzua eta garagardo dastatzea egongo da egun osoan zehar.
