Maketa Lehiaketa
Maketa Lehiaketa 2018
Baditugu bozketa-fasean lehiatuko diren hogeita bat finalisten izenak
LUZIA ZUGADI | EITB.EUS
Martxoaren 22ra arte egongo da zabalik botoa emateko epea. Hortik bi taldek lortuko dute finalerako txartela. Gainera, GazteBizHitza saria eramango du entzuleen babesik handiena jasotzen duen taldeak.
Laurogei bat taldek hartu dute parte Maketa Lehiaketaren XXVII. edizioan, alabaina, hogeita batek soilik lortu dute bozketarako txartela. Hain zuzen ere, epaimahaikideek egindako hautaketaren ostean erabaki dugu zein diren bigarren fase honetan lehiatuko diren euskal musika taldeak.
Estilo anitzeko eta adin-tarte guztietako musikariak arituko dira lehian martxoaren 15etik 22ra iraungo duen bozketa-fasean. Rock doinuak dira nagusi finalisten artean, baina bestelako erritmoak ere badira. Gainera, lehiakide gehienak talde gisa aurkeztu badira ere, bakarlariren bat edo beste ere badago.
Orain, Gazteako entzuleen eta erabiltzaileen esku dago, beraz, azken erabakia. Izan ere, zuen botoei esker sailkatuko dira bi talde edo bakarlari apirilaren 27ko final handirako. Halaber, GazteBizHitza saria norentzat izango den erabakiko dute zuen botoek. Dakizuenez, egunean boto bakarra eman dezakezue.
Sailkatutako hogeita bat taldeak
1. Haustura
3. Marban
4. Pomeray
5. Pho-Bo
6. Eley
7. Ellas
8. Müller
9. Blue Beans
10. Reuben RG
11. Deus Ez
12. Nerabe
13. Sara Azurza
14. Hakima Fissi
15. Kavalvika
17. Nax
18. Midnight Road
19. Biren
20. Silence
21. Superacid
Finala:
Guztira, bost taldek edo bakarlarik lortuko dute final handirako txartela. Finala apirilaren 27an egingo dugu, Bilboko Kafe Antzokian, eta bost finalistak bertan arituko dira zuzenean, euren kantuak eskaintzen. Epaimahaikideek horietako hiru aukeratuko dituzte, eta beste biak boto gehien jaso dituzten biak izango dira.
Sariak
Ohi bezala, sari potoloena (Epaimahaiaren Saria) jasotzen duen talde edo bakarlariak 5.000 euro eskuratuko ditu, eta Bilbao BBK Live jaialdian aritzeko aukera izango du.
Entzuleen babesik handiena jasotzen duenak, ostera, 2.500 euro eramango ditu (GazteBizHitza saria).
Horiez gain, beste sari bat egongo da: Kafe Antzokiaren sari berezia. Irabazleak 300 euro jasoko ditu.
Sari bat jasotzeak ez du beste bat lortzeko aukera baztertzen.
