'Marijaia 2018' saio berezia bere ordu tartean nagusi izan zen larunbatean

Larunbatean, ETB2n Arriaga antzokiko plazatik zuzenean eskainitako 'Marijaia 2018' saio berezia audientzia buru izan zen bere ordu tartean, % 13,1eko kuotarekin. Bilboko Aste Nagusiaren hasiera ekitaldiaren zuzeneko emankizunak 150.000 ikus-entzuleko audientzia metatua izan zuen Euskadin eta eragin eremuan. 2015etik Marijaiari egindako ongietorririk ikusiena izan da aurtengoa.

Donostiako Aste Nagusiko saioek harrera bikaina

Bilbok Donostiaren lekukoa hartu du; izan ere, larunbatean esan zioten agur aurtengo Aste Nagusiari Gipuzkoako hiriburuan. ETB1ek gauero Donostiako jaiei eskaini dien saio bereziek audientziaren babesa izan dute: % 5,2ko audientzia zatia lortu dute batez beste, eta % 10,8ra iritsi da euskaldunen artean.

Eusko Label Liga eta 'El asesino del lago' minisaila, audientzia buru

Igandean, Euskal Telebistako bi emanaldi bere ordu tartean nagusi izan ziren: ETB1en, Eusko Label Ligako estropada (Zarauzko Ikurrinaren 2. jardunaldia izan zen ikusgai), % 12,8ko kuotarekin; eta ETB2n, 'El asesino del lago' minisailaren amaiera, % 10,8ko kuotarekin. Zortzi atalez osatutako Frantziako ekoizpenaren azken hiru atalek 102.000 ikus-entzuleko audientzia metatua eskuratu zuten Euskadin eta eragin eremuan.

Bestalde, igandeko Euskotren Ligako Zarauzko Ikurrinaren norgehiagokak ere harrera ona izan zuen, % 13ko audientzia zatia bereganatuz.