'Vascos por el Mundo' saioa Singapurren izango da gaur gauean

Gorka Vallejo kazetariak Asiako Singapur hiri handia ezagutuko du gaurko 'Vascos por el Mundo' saioan. Oso herrialde gaztea da, 53 urte ditu, eta populazio dentsitate ikaragarri handia dauka. Aldi berean estatua, hiria eta uhartea da, eta %2ko langabezi tasa dauka. Horregatik, hainbat euskaldunek herrialde hau aukeratu dute bizi berri bat hasteko.

Lehenik eta behin, Alberto bilbotarra ezagutuko du Gorkak. Malasiako emakume batekin maitemindu zen eta zalantzarik izan gabe Asiara mugitu eta software ingeniari bezala ibilbide profesionala abiatu zuen Singapurren. Bere emazte eta seme-alabak aurkeztuko dizkigu eta hiriko finantza auzoa erakutsiko dio Gorkari.

Alaitz Usansolokoa da eta duela urte t'erdi bizi da Singapurren bere senarra eta 6 eta 9 urteko alabekin. Alaitzen senarrak Asiako hirian lan egiteko eskaintza jaso zuen eta familiak ez zuen bertara joateko zalantzarik izan. Alaitzekin batera auzo arabiarraren sekretuak ezagutuko ditugu eta Singapurreko biztanleen nortasuna euskaldunen antzekoa dela ikusiko dugu.

Gonzalo Algortako enpresaria da. 34 urte ditu eta bere enpresa propioa sortu du Singapurren. Euskal Herriko Unibertsitatean kazetaritza ikasi zuen, eta orain marketinaren alorrean lan egiten du Singapurren. Sei urte daramatza Asiako hiri honetan, eta bere hiriko tokirik gustukoenak erakutsiko dizkigu. Gonzalorentzat Singapur aukeren herrialdea da.

Koldo benetako ibiltaria da. Australian, Japonian, Estatu Batuetan eta Singapurren bizi izan da. Besainekoa da, baina berarentzat munduak ez du sekreturik. Singapurreko auzo txinatarrean izango dira berarekin eta hiriaren 53. urtebetetze jaiaren ospakizunetan murgilduko dira. Gainera, bere ahizpa Maialenen bila joango da aireportura. Singapurrera datorren lehen aldia da, eta 30 kiloko maleta batekin etorriko da, gurasoek Koldori bidaltzen dioten janariaz beteta.

'Vascos por el Mundo' asteazkenetan izaten da ETB2n eta eitb.eus-en ikusgai, 22:30etik aurrera.