Txomin Artola abeslaria bere azken lanaz arituko da, gaur, "Biba Zuek!" saioan

Gaurko "Biba Zuek!" saioan Txomin Artola abeslaria izango dute gonbidatu. Hondarribiko abeslaria bere musika ibilbidea biltzen duen antologiaz hitz egingo du Maddalen Arzallus eta Xabier Sukiarekin.

Bestalde, Jon Garatek Txomin Artolaren artxiboan arakatuko du, Antton Telleria irrati esatariak eta monologistak irribarrea eragingo diguten albiste politak ekarriko ditu eta Aritz Ganboa artzainak platoa bisitatuko du.

Saioaren lehen orduan, berriz, euskal diasporaz mintzatuko dira, bere nazioarteko eguna ospatuz. Iñaki Goirizelaia izango dute platoan eta kanpoan bizi diren euskaldunak bilduko dira solasaldira. Amaia Agirre bertsolariak ere bat egingo du etxetik gaiaren bere ikuspuntua emateko.

"Biba Zuek!" astelehenetik ostiralera da ikusgai, 18:00etatik aurrera, ETB1en eta eitb.eus-en.