Maite Bastos eta Felix Arkarazo, gaur gauean, 'Gure Kasa'n

Gaur gauean, 'Goenkale' telesail mitikoko bi aktore izango dituzte gonbidatu 'Gure Kasa' saioan: Maite Bastos eta Felix Arkarazo (Margari eta Andoni). Maite 1994an hasi zen 'Goenkale'n, eta 15 urtez aritu zen bertan. Felix bigarren denboraldian iritsi zen Arraldera, eta telesaila amaitu arte aritu zen bertan. Beren hasiera eta ibilbidea errepasatuko dituzte, eta egindako beste lanez ere mintzatuko dira.

Nahiara Gagok 'Goenkale'ko aktore eta pertsonaiekin jolasean jarriko ditu bi gonbidatuak. Nerea Aliasek, berriz, horien irudi bitxiak aterako ditu ETBko artxibotik.

Aitor Frantsesenaren tartean, Ane Alberdi ezagutuko dugu, mundu mailan benetan ondo dabilen arkularia. Beso bat motza dauka, baina desabantaila horrekin ere ederki moldatzen da.

Iban Garcia youtuberra sukaldean sartu da berriz ere. Haragi-bola erraldoi eta ikusgarri bat prestatzen ahaleginduko da.

'Gure Kasa' 21:30ean izaten da ikusgai ETB1en eta eitb.eus-en.