Gaztea

Gaztea

Kontzertuak

Rosalia Bilbon: ‘Despechá’ren estreinaldia eta bi orduko ikuskizun gogoangarria

B. F. | EITB Media

Kataluniar artistak gaur estreinatu du ‘Motomami Tour’ biran jotzen hasi den abesti berria. Barakaldoko BEC!en eskainitako kontzertuan iragarri du argitalpena.

  • Rosalia, Bartzelonan emandako kontzertuan

    Rosalia, Bartzelonan emandako kontzertuan. Argazkia: EFE

Albisteak (1)

Bideoak (1)

Lepo betetako Bizkaia Arenan, argidun maskarekin jantzita eta motorren orro artean agertu da Rosalia, Motomami birako hamargarren zuzeneko emanaldian.

Zortzi dantzariz inguratuta eta hiru pantaila bertikalez osatutako oholtzan, 'Motomami' diskoko abesti dantzagarrienen bilduma izan da Rosaliak BEC!en aurkeztu duen hasierako platera.

Koreografia ikusgarriez gain, pianoan eta gitarra soinean hartuta agertu da gaueko protagonista, bakarrik, "Dolerme" eta "Hentai" abestietan.

Zuzenekoa abiatuta, ikuskizunaren erritmoa gelditu eta datorrena iragartzen duen keinua: antzinako ile-apaintzaile aulkian eserita, mototsak moztu, txirikordak askatu eta makillajea kendu du Rosaliak, azken diskoko leitmotiva den eraldatzearen irudikapen literal gisa.

Ordutik aurrera, publikoak burutik burura abestu dituen El Mal Querer diskoko hitak eta reggaetoi munduko klasikoez osatutako remix dantzagarria.

Emanaldiaren bukaera aldera, Motomami Tourrean jotzen hasi den kanta berriaren iragarpen txalotua: "Bira honetan jotzen hasi naizen abesti honek Despechá du izena eta, Jainkoa lagun, gaur gauean aterako da".

Birako beste kontzertuetan bezala, publikoarekin zuzeneko harremana izan du artistak. Bada, fanek egindako pankartak irakurri, maitasun mezuak eskertu, ikurrina jantzi, disko bat zuzenean sinatu eta lehen ilaretako zaleei mikrofonoa utzi die artistak, berarekin kantatzeko.