Gaztea

10:03

Gaztea

Benidorm Fest

‘Sayonara’ Eurovisioni: Twin Melodyk ez du lortu Benidorm Festeko finalera pasatzea

B. F. | EITB Media

Ordiziar bikotea Benidorm Festeko lehen finalerdiko galan lehiatu da bart, beste zortzi lehiakiderekin batera.

  • Twin Melody, Benidorm Festen

    Twin Melody, Benidorm Festen. YouTubeko bideotik ateratako irudia

  • Whatsapp
  • Whatsapp
  • telegram
  • Bidali
  • Esteka kopiatu

Albisteak (2)

Bart emititu da 2023ko Benidorm Festeko lehen finalerdia, Agoney, Alice Wonder, Aritz, Fusa Nocta, Megara, Meler, Sharonne, Sofia Martin eta Twin Melody artisten zuzenekoekin.

"GU" saioan gogotsu zeudela kontatu ziguten arren, Twin Melody ahizpek finalean sartzeko aukera galdu dute. Izan ere, "Sayonara" abestiaren zuzenekoak ez du publikoa konkistatu.

Gaztean aurreratu bezala, ikuskizun koloretsua eskaini dute ahizpa bikiek. Dantzariz inguratuta, koreografia ikusgarria eskaini dute. Hori gutxi balitz bezala, errekor bat hautsi dute: Benidorm Festeko oholtza gainera eraman dute euskara, lehen aldiz.

Euskal tiktoker biralenek azken aurreko postua eskuratu duten arren, publikoak eta sare sozialetako erabiltzaileek bi ahizpei agertutako babesa erabatekoa izan da.

Zer da boto demoskopikoa?

Profesionalen epaimahaiak (% 50), publikoak (% 25) eta epaimahai demoskopikoak (% 25) izan du azken hitza. Gaueko ikuskizunetatik lau artistek lortu dute larunbat honetako (otsailak 4)  final handirako sailkatzea: Agoney, Alice Wonder, Fusa Nocta eta Megara.

Iazko legez, boto demoskopikoaren gaiak hautsak harrotu ditu Benidorm Festeko zaleen artean. Lehiaketako antolatzaileek azaldu dutenez, inkesta bat bete duten 350 pertsonek osatzen dute epaimahai demoskopikoa. Talde horren ezaugarriak, baina, ez dira ezagutarazi eta horrek zaleen mesfidantza piztu du.

Bigarren finalerdia

Ostegun honetako bigarren finalerdian beste zortzi musikariren zuzenekoaz gozatzeko aukera izango da, 22:00etatik aurrera, RTVEren La 1 katean.

Alfred García, Blanca Paloma, E'Femme, Famous, José Otero, Karmento, Rakky Ripper, Siderland eta Vicco izango dira gaueko protagonistak.

Puntu gehien lortzen dituzten lau partaideak beste lau finalistekin lehiatuko dira, eta irabazleak espainiar Estatua ordezkatuko du Eurovisionen. Liverpoolen izango da aurtengo edizioa, maiatzaren 13an.

 

Iruzkinak

    • Irratia zuzenean

    Gaztea Entzun zuzenean