‘Dantza Plazetan’ programak euskal folklorea sustatuko du Bilbon

Bilboko Udalak “Dantza Plazetan” kultur programaren hamabosgarren edizioa aurkeztu du, euskal folklore herrikoia sustatzeko helburua duena, herrietako plazetan egiten ziren erromeriak, dantza saioak eta kalejirak eskainiz. Modu horretan, tradizioko dantzek zuten parte-hartze handia lortu nahi da.

Larunbatean, urtarrilak 30, hiru ekitaldi egongo dira. Eguerdiko 12:00etan, San Felicisimon (Deustun), Bihotz Alai Folklore Dantza Taldeak urteko lehen dantza-agerraldia eskainiko du. Arratsaldeko 20:00etan, erromeria tradizionala izango da Santiagoko plazan (Zazpi Kaleak); Salbatzaile Dantza Taldearen eskutik. Halaber, 20:30ean beste erromeria bat egongo da Deustuko Done Petri plazan.

Igandean, hilak 31, 11:30ean, Ondalan Erraldoien Konpartsak kalejira egingo du Deustun.

“Dantza Plazetan” programak 51 emanaldi biltzen ditu urtean zehar, hiriburuko barrutietan banatuko direnak. Esaterako, ekainaren 11n (larunbata) Larrain Dantza izango da Areatzan, eta uztaileko larunbat arratsalde guztietan dantza-agerraldiak egingo dira Arriaga plazan.