Joxean Muñoz Kultura sailburuordea 'Faktoria'n

Gaur, osteguna, 16:00etan zabalduko ditu ateak Xabi Larrazabalek eta Maider Segurolak zuzentzen duten 'Hiri Gorrian' saioak. Lehen orduan, "Zer da normala izatea?" galdetuko diote Markos Zapiani. Horren ostean, atentzioa eman diguten Twitterreko aurkezpen lerroen atzean dauden lagunekin hitz egingo dute. Bigarren orduan, pisukideen tertulia izango dute, eta Txilen bizi den Josune Azurmendirekin hitz egingo dute.

18:00etan, Ainhoa Etxebestek zuzentzen duen 'Mezularia' saioan, eguneko ahotsen errepasoa egin ondoren, 18:30etik aurrera, gazteen tertulia egingo dute EGK-ko Itxaso Anduezarekin, ENHEko Garikoitz Nazabalekin eta Ander Rozasekin.

Eta, 20:00etan, 'Arratsean' saioan, Iñaki Ziarrustak Arren ganbara eta emeen sotoa antzezlanaz hitz egingo digu. Markos Unzetak Seinalea diskoa aurkeztuko digu eta Begoña del Tesok aste honetan estreinatuko diren pelikula batzuen berri emango digu.

Bihar, ostirala, Maite Artolak zuzentzen duen 'Faktoria' saioan, Joxan Muñoz Kultura sailburuordea elkarrizketatuko dute, 09:00etan; bere arloko gai nagusiak errepasatzeaz aparte, besteak beste, Donostia 2016 eta Chillida Leku izango dituzte hizpide. Ondoren, Zumarragako Mikel Serrano, Errenteriako Julen Mendoza eta Zamudioko Igotz Lopez batuko dituzte alkateen tertulian, eta, programa amaitzeko, Galdakaorekin bat egingo dute, Hodei Egiluz gaztea desagertu zela urtebete betetzean.

10:00etan, Manu Etxezortuk zuzentzen duen 'Faktoria' magazineko lantaldeak hartuko du lekua Euskadi Irratian. Programaren lehen minutuetan Andoni Tolosa 'Morau'rekin hitz egingo dute; diskoak auzolanean egiteko laguntza eskatuko du. Ondoren, Amets ameslari liburuaz hitz egingo dute Fernando Morillo idazlearekin berarekin eta portadarako inspirazio izan den Nekane Agirrerekin; 'Nola hitz egin haurrei bularreko minbiziaz?' galderari erantzuten dio liburuak. Gatazka batetik eratorritako bideo dokumental bati buruz ere hitz egingo dute 11:30ean: Sarearen oihuak. Lea-Artibai ginekologia zerbitzua hobetzeko eskaerekin osatutako dokumentalaz hitz egingo dute Arantxa Ibarra zuzendariarekin.

16:00etan 'Hiri Gorrian' saioaren tartea zabalduko da. Lehen orduan, Indigo taldearen zuzenekoa entzun, eta Lukas kolonbiarrarekin hitz egingo dute. Bigarren orduan, tertulia birala izango dute.

'Mezularia' saioan, egunak emaniko albiste nagusiak sakonago aztertuko dituzte, eta Bruselaseko eta Kataluniako korrespontsalekin asteko albisteak errepasatuko dituzte 18:30etik aurrera.

Eta, 20:00etan, 'Arratsean' saioan, Rosa Arregiren Begirada baten egitura argazki liburuko irudiak gerturatuko dizkigute.