Luhusoko finalerdia eta Urbiako Tabernako saioa Hitzetik Hortzeran

Finalaurrekoetan da Xiberoa, Lapurdi eta Baxe Nafarroako Xapelketa. Aurreneko saioa Luhuson egin zuten eta bigarrena larunbatean izango da Gabadin. Hitzetik Hortzeran Gabadikoaren berri emango dute eta, horrenbestean, baita Donibane Lohitzuneko finalean, azaroaren 13an, kantatuko duen zortzikotearen berri ere. Dena dela, Luhusoko saioari eskainiko diote arreta handiena: bertsoaldi onenak eta protagonisten iritziak bildu dituzte.

Lizaso, Murua eta Egaña urbiako Tabernan
Dozena bat urte badaramate Urbiako Fondan bertso saioa antolatzen urriaren 12an. Aurten Barru giro zegoen eta sutondoan kantuan hasita epelak bota zizkioten elkarri. Lizasok, Muruak eta Egañak ez ezik gainontzeko bazkaltiarretako batzuek ere ekin zioten kantuari eta arratsalde pasa goxoa egin zuten. Mikel Etxezarreta zegamarra artzaina da Urbian eta bertsotarako afizio gogorra dauka, han antolatzen dituzten saioetan ez du hutsik egiten. Berak saioan izandako bizipenak kontatuko dizkio Jon Artanori.

Gasteizko txapeldunen saioa bertsoa.com-etik
Gasteizko Jimmy Jazz aretoan saio ederra egin dute euskalerrietako txapeldunak bilduta: Oihane Perea, Aitor mendiluze, Julio Soto, Igor Elortza, Amets Arzallus eta Maialen Lujanbio aritu dira Idoia Beitiak jarritako gaiei kantuan. Hamaika Bertuteko kideek Orioko gaztetxean egindako bertso saio musikatuaren zati bat ere ikusi ahal izango da jasotako bideoen tartean.

Zappingean Uztapide eta Basarriri Seguran, 1982an, egindako omenaldia
Igandean 28 urte beteko dira Seguran omenaldia egin zietela Basarri eta Uztapideri eta orduko irudiak berreskuratuko ditugu artxiboko atalean. Basarriren ahots durundatsua gozatu eta Joxe Kruz Ezeiza Uztapidek jarritako bertsoak kantatzen ikusteko aukera izango dugu. Zuri-beltzekoan, berriz, Xanpun Xalbadorri kantuan. Hori guztia igandean 21:00etan, ETB-1en, eta eitb.com-en.