Bertsolaritza
Asteburu honetan
Bertso Eguna mintzagai, aste honetan Hitzetik Hortzeran
Hitzetik Hortzera
Usurbil eta Getariako saioak izango ditugu ikusgai, eta Alaitz Rekondo gai-jartzailea elkarrizketatuko dute.
Bertso saio entretenigarria osatu zuten joan den igandean Usurbilgo Sutegi kulturunean Andoni Egaña, Onintza Enbeita, Unai Iturriaga eta Uxue Alberdi bertsolariek eta Inaxio Usarralde gai-jartzaileak. Getarian berriz, San Anton egunez, gozatua hartu zuten ehunka zalek bertso jaialdian. Kartelean: Iñaki Murua, Patxi Etxeberria, Imanol Lazkano, Sebastian Lizaso, Gregorio Larrañaga Mañukorta eta Andoni Egaña. Jon Zaldua jardun zen bertsolariei gaiak ematen eta elkarri puntu jartzeko proposatu zienean sortu ziren txinparta indartsuenak.
Rekondorekin Bertso Egunaz eta Nafarroaz
Azaro hasieratik ari da Bertso Eguneko talde antolatzailea lanean hilaren 29koa prestatzen. Hitzetik Hortzera talde horren azken bileran izan da Itziarren. Bertan grabatutako irudiak erakusteaz gain antolatzaileetakoa den Alaitz Rekondo gonbidatu du platora saioko lantaldeak. Bertso Eguneko ekitaldiak isilpean gorde izan ohi dira urtero baina prestaketa lanen nondik norakoak eta egitarauaren xehetasun batzuk argituko ditu Rekondok. Bertso Eguneko iragarkia erakutsiko dute eta gero eta gertuago dagoen Nafarroako Txapelketak dakartzan berrikuntzez ere solastuko dira.
Zuri-beltzekoan Basarri, Oranda eta Iribar
Fonotekatik ateratako pitxia ez da nolanahikoa asteon. Inazio Eizmendi Basarrik hala aginduta Joxe Agirre Orandak Joxe Angel Iribarri botatako pare bat bertso eder Zarauzko atezainaren irudiekin beztitu dituzte. Zapping-ari ‘Sagardoaren graziya’ jarri diote izenburu ale honetan. Izan ere urtez urte Hitzetik Hortzerak sagardotegietan egindako grabazioetako pasarte xelebreenetatik txatalak hartu eta elkarri josita emango dituzte artxiboko atal horretan. Jasotako bideoa Zumaiako Gaztetxetik bidali dute.
Igandean, 21:00etan, etb1n. Eta, oso-osorik, lehenagotik ikusgai eitb.com-en.
OHARRA: Urtarrileko azken asteburuan ez da Hitzetik Hortzerarik izango. Euskal Telebistak Bertso Eguneko ekitaldia emango du larunbatez 22:00etan hasita ETB1-en. Otsailaren 6an, betiko egun eta orduan, itzuliko da HH Beterriko Txapelketarekin.
