‘Joxe Agirre, Izarraizko azeria’ saio berezia larunbatean, ETB 1en

Hilberri den Joxe Agirre, Oranda, bertsolariari buruzko saio berezia emitituko da larunbatean 15:00etan, ETB 1en. Bere bertsoaldi onenek bideratuko dute saioa eta bertsolaritza arloko adituek euren iritziekin osatuko dute bertsolariaren omenezko programa.  

60 urte baina gehiago oholtza gainean eman ondoren, 83 urte zituela hil zen abenduaren 15ean Izarraizko bertsolaria. Bere ibilbidea gogoratzeko egindako saioan, Agirreren bertsoaldi hautatuak izango ditugu ardatz, puntuka zein emandako gaiei kantari. Joxe Lizaso edo Amets Arzallus bezalakoekin ere ikusi ahal izango dugu.

Gainera, Agirreri buruzko iritzi bilketak osatuko du saioa, Jokin Uranga, Imanol Lazkano, Xabier Euzkitze edota Joxean Agirreri galdetuz, besteak beste. Duela urte batzuk Agirrek Manuel Sein Xanpun, Jon Azpillaga eta Joxe Lizasorekin Rezola sagardotegiko mahai-jiran egindako tertuliako pasarteak ere emango dituzte.

‘Joxe Agirre, Izarraizko azeria’ programa berezia larunbatean emitituko da. 15:00etan ETB 1en. Eitb nahieran-en ikusteko aukera ere egongo da.