albistea
22:15ean
ETBrekin maiteminduz, gaur gaueko '30 Urte Kantuan' saioan
A.H.
EITB
Urtea amaitzear dagoen honetan, maitasunez jantziko da Joseina Etxeberria eta hainbat kanta eta film gogoratuko ditu, baita ligatzeko aholkuak eman eta jaso ere.
30 urtez izan da ETB gure bizitzan, eta 30 urte horietan hamaika kantu erromantiko entzun dira telebistan, baita hamaika pelikula erromantiko ere. Festa giroan, lagun artean, familia eta bikotearekin egoteko diren egun hauetan, ETBk gogora ekarri nahi ditu guzti horiek Joseina Etxeberriaren eskutik. Gala osoan zehar hiru lagun, oso erromantikoak hirurak, izango dira Joseinarekin: Joannes Passicot, Asier Hormaza eta Aintzane Gamiz.
Beraien eskutik, gainera, ETBn bikote izan diren hainbat famaturi errepasoa egingo diete, ETBko aurkezlerik galantena zein den asmatzen ahaleginduko dira, gonbidatuek nola ligatu behar den azalduko dute, nola bizi izan zuten lehen aldiz maitemindu zireneko garaia, baita gustukoen duten filme erromantikoa zein den ere.
EITBko aurkezle eta esatari askoren eskutik, maitasunaren inguruko sekretu asko jakingo dituzte eta kaleko pertsonen eskutik eskaerak jasoko dituzte. Baina dana, kantuz blai, noski. Horrela, larunbateko saioan, 'Kantuan' eta 'Kantuan Lehiaketa'n kantari ibili ziren gazteak izango dira gonbidatu: Idoia Bediaga, Jon Urbieta, Leire Tejada, Juanpa Agirre eta Eider Roza. Eta entzungo dituzten kantak, besteak beste: 'Tell him', Barbra Streisand eta Celine Dionen bertsioan, Mocedadesen 'Eres tú' ('Zu zara'), 'Maitasun hitzak', Ken Zazpiren 'Haizea'. Filmeetako kanta ezagunak ere gogoratuko dituzte: Ghost pelikulako 'Unchained Melody', Grease musikaleko melodia martxosoa Oñatiko Abesbatsaren eskutik, Pretty Woman-eko singlea (Izaro eta Elenek kantatua), 'The power of love' eta ezin falta zena 'I will always love you', Sara Azurza kantari gazte donostiarraren ahotsean.
Guzti honi hasiera emateko, Zuriñe Hidalgo (Hesian taldeko bakarlari eta 'Kantuan' saioan ikuslegoaren irabazlea) eta 'Kantuan Lehiaketa'ko kantariek, 'Berriro elkarrekin ETB 30 urte' kanta eskainiko dute elkarrekin.
'30 Urte Kantuan' gaur gauean emitituko da 22:15ean ETB-1en.
