Guanaco taldearen desagertzearekin itzuliko da gaur 'El Conquis'

"El Conquistador del Fin del Mundo" gaur izango dugu berriz ikusgai. Modu harrigarrian hasiko da saioa, Guanaco taldea desagertu egingo baita.

Gokuren taldean 4 kide besterik ez dira gelditzen eta, Picheekin egin zuten bezala, lehiakideak Condor eta Puma taldeen artean banatuko dituzte. "El Conquis 2013" eztabaida-saioan eskaini zituzten aurrerapenetan ikusitakoaren arabera, Julianek Goku, Juanito eta Blanca kapitainei azalduko die Guanaco taldea desagertu egingo dela. Gainera, lehiakideek erabaki beharko dute zein taldera joan nahi duten. Goku eta Chris Condor taldera joango dira, eta Alex eta Naty, Puma taldera.

13. atalean ikusiko dugun immunitate jokoan sare batean eskegita egon beharko dira lehiakideak. Sareari heltzeko eskuak zein oinak erabiltzeko aukera izango dute, eta guztiek parte hartuko dute, lehiakide zein kapitainek. Ibaira erortzen den azken partaidearen taldea izango da immunitate jokoaren garailea.