Naty gogor saiatu da, baina Dianaren aurka galdu egin du

Natyren eta Dianaren arteko duelua espero baino parekatuagoa izan zen. Nafarra mirari bidez sendatu zen, edo bere mina esan baino txikiagoa zen (duela aste pare bat Armadarekin gertatu zen bezala). Aizkorarekin zutoina moztu behar zutenean oso berdinduta ibili ziren, baina, azkenean, Dianak lortu zuen garaipena. Orain, Dianak bere kapitainarekin duen harremana ez da lehenagokoaren bezalakoa izango. Bera duelura joatea erabakitzeak ondorioak ekarriko ditu taldean. "Betiko" pumak salduta sentitzen dira; izan ere, Blancak nahiago izan zuen Alex salbatu eta Diana duelura bidali zuen.

Egia esan, Blancak Natyri joateko esan zionetik giro nahasia zegoen talde gorrian. Alex Guanaco taldeko kidearen alde azaldu zen, eta egoera tirabiratsua zen. Natyk indarra hartzeko jatea erabaki zuen. Baina alferrik izan zen. Iruñera bidean da, bere ileapaindegira bueltatzeko prest.

Condor Juanitoren taldeak trinko jarraitzen du. Gokuren kanporatu zuten, eta orain Chrisek alde egitea nahi dute. Juanitoren taldeak Agateri eman zion immunitatea eta, beraz, zeharka, Naty etxera bidali zuten. Gainera, immunitate proba irabaztearen ondorioz lortutako whiskyari esker, kapitaina poz-pozik dago. Une barregarriak izan genituen Puma taldearen bileran Juanitoren mozkorraren ondorioz.

Abentura gogorra izaten ari da Blancarentzat, eta taldeko jokoan berriro ikusi genuen ez dela ongi ari. Denok uste genuen Juanitok hanka-sartzeak izango zituela puzzlearen immunitate jokoan pazientzia ezaren ondorioz. Baina mendizalea primeran ibili zen, eta eskiatzaleak hainbat huts egin zituen. Behin eta berriz nahasi zen bere taldekideen izenekin, fitxa okerrak aukeratu zituen eta zuzenak atzera botatzen zituen, ez zuen bihurrikeriaz jokatu nahi izan Dianak proposatu zionean... Akats gehiegi jokoa irabazi ahal izateko.