telebista
Audientzia oharra
'Ezin Dut Burutik Kendu'ren estreinaldi arrakastatsua
A.E.
EiTB
Ia %10eko audientzia eskuratu zuen "Sarri Sarri" eta "Xalbadorren Heriotzean" abestiei buruzko saioak eta Twitterren ere joera izatera iritsi da #sarrixalbador traolarekin.
-
Fermin Muguruza eta Zuhaitz Gurrutxaga | Ezin dut burutik kendu
Zuhaitz Gurrutxagak ETB1en aurkeztutako 'Ezin Dut Burutik Kendu' saioak arrakasta itzela izan zuen bere estreinaldian; euskaldunen artean %9,7ko audientzia eskuratu zuen eta 85.000 ikus-entzuleko audientzia metatua, EAEn eta eragin esparruan.
'Ezin Dut Burutik Kendu' saioan, Zuhaitz Gurrutxaga aurkezleak gure oroimenean gordeta ditugun kantu kuttunak aztertzen ditu tarte honetan. 'Sarri Sarri' eta 'Xalbadorren heriotzean' abestiak aukeratu zituzten lehen atalean. Kortatu taldeko kideekin eta bertako kantaria zen Fermin Muguruzarekin hitz egin zuen Zuhaitz Gurrutxagak euskal kantarik entzunen eta dantzatuenetakoa den honi buruz. Horrez gainera, 'Sarri Sarri'ren letra egin zuen Lurdes Darcelesen iritzia ere jaso zuen.
Xabier Leteren 'Xalbadorren Heriotzean' kanta gogoratzeko unean aldiz, Xalbador bertsolaria bera nor izan zen gogoratu zuten Mikel Markez kantariak eta Xabier Amuriza bertsolariak. Eta Juantxo Zeberio musikariaren iritzia ere jaso zuen Zuhaitz Gurrutxagak.
Joera Twitterren
Interneten eta sare sozialetan ere ohiartzuna izan zuen programa berri honek emisio garaian. Alde batetik, umap.eu atariaren arabera, euskaraz aritzen diren tuiterlarien artean joera izan da saio honi buruz sortutako #sarrixalbador traola. 500 tuit baino gehiago egin ziren termino hori erabilita.
Jende ezagun eta ezezagun askok eman zuten saioari buruzko iritzia. Rafa Rueda musikariak, adibidez, honakoa esan zuen: "Oso gustura ikusi dut "Ezin dut burutik kendu" saioa. Zorionak "errudun" guztioi!! #SarriXalbador #ezindutburutikkendu". Eli Pinedo Bera Bera taldeko eskubaloi jokalariak ere ikusi zuen: "ezin izango dugu burutik kendu ez #SarriXalbador .Gure herriaren istoria hor.. zenbat oroimen... zorionak! hunkigarria benetan! @zuhaitzgurru"
Eta 'Ezin dut burutik kendu' EiTB Nahieranen ere gero eta ikustaldi gehiago izaten ari da. Asteartean, ETB1en emititu ostean, jarri zen zerbitzu honetan eta bigarren saio ikusiena izatera iritsi zen ordu gutxitan.
Orio Produkzioak ekoiztetxeak egindako saio honek segida izango du udazkeneko programazioan.
