Lau t'erdiko kanporaketa eta Bera Beraren partida, gaur

Zuzeneko bi kirol emanaldi izango dira gaur ETB1en eta ETBKn: lau t'erdiko pilota txapelketako aurrekanporaketako partida, Aritz Lasa-Mendizabal III, eta Bera Berak Vardar taldearen aurka jokatuko duen Txapeldunen Ligako lehen neurketa. Biak ala biak internet bidez ere jarraitu ahal izango dira eitb.com-en.

Emakumeen eskubaloiko Txapeldunen Ligako lehen hitzordua du igandean Bera Berak, Mazedoniako Vardar taldearen aurka. ETBKn jarraitu ahal izango da partida zuzenean 12:15etik aurrera, Jon Ander Gorosperen eta Jose Inazio Altuberen kontakizunarekin.

17:00etan, ohi denez, "ETB Kantxa" saioa hasiko da ETB1en, Eibartik zuzenean. Lehendabizi, lau t'erdiko txapelketako aurrekanporaketa izango da jokoan Aritz Lasa eta Aitor Mendizabalen artean. Ondoren, Titin III-Merino II / Julen Retegi-Pascual partidako jokatuko da. Xabier Euzkitze, Joxan Tolosa eta Elena Azpeitia izango dira esatariak.

Herri kirolei eskainitako leihoa 13:00etan zabalduko du ETB1ek. Irailaren 29an Aizarnazabalen jokatutako 2. mailako Aizkolarien Euskadiko Txapelketaren berri emango dute Koldo Aldalurrek eta Joxe Etxebestek.

ETB1eko kirol eskaintza futbolak osatuko du. Mikel Olazabalek zortzigarren jardunaldiaren errepasoa egingo du "Gol Festa" saioko bi edizioetan: 19:30ean eta 20:45ean.

Athleticen partidaren laburpena 'Tribuna Gol' saioan

Athleticek Valenziaren aurka jokatuko duen partidaren laburpena eskainiko du "Tribuna Gol" saioak ETBKn. Txemi Galarragak 22:15etik aurrera gidatuko duen kirol saioak luze eta zabal aztertuko du euskal taldeen jarduna zenbait solaskiderekin.

ETBK Sat-eko kirol eskaintza hiru emanaldik osatuko dute: 15:30ean, Euronascarreko Monzako Saria, Iñaki Mikeorekin; 19:20ean, Gaubeka-Garma / Altadill-Imanol pala partida, Iñigo Aiestaran eta Mikel Aierberekin; 20:30ean, Egiguren II-Suso / Iturbide-Ibai Erkiaga zesta norgehiagoka, Iñigo Aiestaran eta Jabier Arkarazorekin.