telebista
22:00etan
'Luis Mariano herrikoia' jaialdia, gaur gauean, zuzenean
A.E.
EiTB
Irundik eskainiko da, abeslaria jaio zeneko mendeurrenaren ospakizunen barruan.
Bideoak (1)
Gaur gauean, 'Luis Mariano herrikoia' jaialdia eskainiko du ETBk zuzenean Irundik, 22:00etan. Abeslariaren jaiotzaren ehungarren urtemuga betetzen da aurten, eta Irungo herriak hainbat ekitaldi antolatu ditu haren omenez.
Jaialdi honetan, Irun Hiria musika bandaren laguntzaz, herriko abesbatzek kontzertu handia eskainiko dute. Lehendabizikoz Luis Marianoren obrak abesbatzetarako bertsioan izango dira entzungai. Gainera, beren-beregi landutako koreografiak eskainiko dituzte. Honako abesbatzek parte hartuko dute jaialdian: Ametsa, Ametsa Gazte, Betiko Ametsa, Argoiak, Larreaundi, Nabartenea, Nayade eta Luis Mariano. Horrez gainera, Irungo dantzari ordezkaritza zabala ere izango da: Cristina Guadaño balleta, Eraiki dantza taldea eta Carlos Zapirain, Miren Gomez eta Jazzarte akademiak. Fernando Etxeparek zuzenduko ditu abesbatzak, eta zuzendari musikala, berriz, Iñaki Gurrutxaga izango da.
Luis Mariano. Euskal ahotsen oihartzun dokumentala
Jaialdiaren aurretik, 21:05ean, Luis Mariano. Euskal ahotsen oihartzuna dokumentala eskainiko da ETB1en. Euskal kulturaren adierazgarrietako bat dugu kantua. Euskaldun askok erakutsi izan dute kanturako grina eta gaitasuna, eta Luis Mariano dugu horietako bat. Horixe du abiapuntu dokumental frantses honek.
Luis Marianoren bizipoza, irribarrea eta azentuak poza eta aire berri eta bitxia dakar II. Mundu Gerraren ondoren.
Opereta estiloaren ikuskizuna euskal ahots handiekin hasi zen: Andre Massary eta George Guétary, esaterako. Baina indarrik handiena Luis Marianorekin eta Francis Lopezekin lortu zuen.
Euskaldunon abesteko grina, elizetan, pastoraletan eta jai nagusi gehienetan nabarmena da. Euskal ahotsen arrakasta handiaren oinarrian abesteko tradizioa dago. Inoiz baino biziago dago gaur egun abesteko zaletasuna. Hainbat talde eta abeslarik eusten diote gar horri: Oldarra gizonen abesbatzak, Baionan Kantuz abesbatzak eta Anne Etchegoien abeslari gazteak, esate baterako.
