telebista
Eguberri eguna ETBn
Musika ikuskizunak eta zinea nagusi, gaur, Eguberri egunean
A.E.
EiTB
'La Noche de... Tasio', eskainiko du ETB2k, eta ETB1ek Pirritx, Porrotx eta Marimotots pailazoen eta EOSaren 'Sentitu, pentsatu, ekin!' ikuskizuna. Ondoren, 'X Urte, Hamaika Lagun' kontzertua.
Gaur, Gabon-egunez, musika ikuskizunak eta zinea izango dira nagusi Euskal Telebistan. ETB1en, Pirritx, Porrotx eta Marimotots pailazoen eta Euskadiko Orkestra Sinfonikoaren eskutik, Sentitu, pentsatu, ekin! ikuskizuna izango da ikusgai.
Ondoren, 'X Urte, Hamaika Lagun' kontzertua eskainiko da, Agustin Ezenarrok eta Ilaski Serranok aurkeztuta. Bilboko Txistularien Udal Bandak 10. urtemuga ospatuko du Euskalduna Jauregian grabatutako emanaldian. Garikoitz Mendizabalek zuzentzen duen txistulari taldearekin batera, Niko Etxart, Gorka Sarriegi (Sorotan Bele), Eñaut Elorrieta, Los Cinco Bilbaínos, Andoni Egaña, Kepa Junkera, Gozategi, Pirritx, Porrotx eta Marimotots, Beti Jai Alai, San Juan Bautista, Leioa Kantika Korala eta Metalaren Boskoteak hartuko dute parte, besteak beste.
ETB2n, berriz, 'La Noche de... Tasio' prestatu dute. Montxo Armendarizen filmak 30 urte bete dituela-eta, omenaldi berezia eskaini nahi izan dio Felix Linaresek aurkezten duen saioak.
Pilota zuzenean Eibartik
Kirolari ere egingo zaio tartea gaur. Eguberri Egunez, ohi denez, Eibarko Astelenatik egingo du pilota emankizuna ETB1ek. Partida nagusia Binakako Txapelketako Olaizola II-Beroiz / J. Retegi-Rezusta izango da, eta jaialdia osatzen, berriz, Aritz Lasa-Tolosa / Altuna III-Merino eta Mendizabal III-Larrinaga / Jaka-Pascual. Emanaldia eitb.eus bidez ere ikusgai izango da.
16:00etako herri kirolen tartean, Aimar Irigoienen marka saiakera eskainiko da, joan den igandean Azpeitiko Izarraitz pilotalekuan izandakoa. Juan Ibarguren Manterolak duela 55 urte lortutako marka bikoitza hobetzen saiatu zen errezildarra.
Gaurko kirol eskaintza, ETB4ko bi emanaldiek osatuko dute: 12:00etan, afizionatuen Bizkaiko Pala Txapelketako finalak, eta 20:15ean, zesta puntako Bilboko sariko finala: Egiguren-Zabala / Olha-Ekhi.
