Denzel Washington, 'Eliren liburua' filmean, gaur, ETB2n

Eliren liburua filma eskainiko du gaur, ostirala, ETB2k, 22:15ean. Denzel Washington da pelikula apokaliptiko honetako protagonista, eta Gary Oldman eta Mila Kunis aktoreak ere ikusiko ditugu bertan.

Etorkizun ez oso urrun batean kokatutako istorioa da, azken gerra handitik 30 urtera, gutxi gorabehera. Gizon bakarti bat AEB izandako lurretan dabil. Hiriak hutsik daude; autobideak, birrinduta. Erabateko suntsiketa izan da. Ez dago ez zibilizaziorik, ezta legerik ere. Zapata pare baten edo ur apur baten truke inor hiltzeko prest dauden taldeen eskuetan daude errepideak... Baina inor ez da bidaiariaren mailara heltzen. Beharrak gerlari bihurtu du Eli, baina bakea baino ez du helburu. Dena den, hari desafiorik eginez gero, ez da kikilduko, eta beharrezkoa bada, edonor akabatuko du. 30 urte daramatza etorkizuna izateko itxaropena defendatzen.

Eliren liburua filma, gaur, 22:15ean, ETB2n ikusgai.