telebista
Kirolak, zuzenean
Real Sociedad-Sporting Huelva eta Ezkurdia/Irribarria, gaur, zuzenean, EiTBn
A.A.| EiTB
Emakumeen Iberdrola Ligako partida 12:00etan, eta Buruz Buruko Txapelketako norgehiagoka 17:00etan.
Gaur, 'Oreka' saioan, emakumeen Iberdrola Ligako Real Sociedad-Sporting Huelva futbol norgehiagoka eskainiko da zuzenean Zubietatik. Naxari Altunak gidatuko du emanaldia 12:00etatik aurrera, Larraitz Lukas lagun duela.
Arratsaldeko 'ETB Kantxa' saioa Eibarko Astelenatik emango da zuzenean 17:00etan. Bertan, hiru pilota partida jokatuko dira: Mendizabal III-Zabaleta/Jaka-Martija eta Buruz Buruko Txapelketako Ezkurdia/Irribarria (lehen maila) eta Gorka/Erostarbe (promozioa). Xabier Euzkitze, Joxan Tolosa eta Elena Azpeitia arduratuko dira kontakizunaz.
Herri kirolen tartea birritan zabalduko dute igande honetan: 11:00etan, Gorostidi Harria eskaintzeko eta 16:00etan, goizean Donezteben jokatutako Buruz Buruko Eusko Label sariko jardunaldia eskaintzeko. Ibon Gaztañazpi izango da esataria bi kasuetan.
Amaitzeko, 12:30ean, ETB4n eta eitb.eus-en, erremonteko Sagardoaren Txapelketako finala eskainiko da Urriza-Garces/Uterga-Zubiri. Iñigo Aiestaranek gidatuko du emanaldia Manuel Arrizabalaga Matxin lagun duela.
