albistea
Kirol emanaldiak
Bibitako pilota finala, igandean, zuzenean, ETB-1 eta eitb.com-en
A.A.
EITB
Xala eta Laskurainek Titin III.a eta Merino II.aren aurka neurtuko dituzte indarrak Bilboko Bizkaia pilotalekuan.
-
Joxan Tolosa eta Xabier Euzkitze. EITB
ETB-1ek eta eitb.com-ek zuzenean eskainiko dute igandean bibitako pilota finala Bilboko Bizkaia pilotalekutik. Arratsaldeko bostetan hasiko da emankizuna, atariko partidarekin, Berasaluze VIII-Apraiz / Idoate-Pascual. Ondoren jokatuko da final handia, Xala-Laskurain eta Titin III-Merino II bikoteen artean. Xabier Euzkitzek eta Joxan Tolosak egingo dute kontakizuna, eta Elena Azpeitiak eta Koldo Aldalurrek armailetan bizi den giroaren berri emango dute.
Pilota munduko hitzordu garrantzitsu honen berri ere emango dute egunean zehar albistegi eta kirol saioetan. Gainera, Euskaditik kanpo daudenek ere zuzenean jarraitu ahal izango dute emankizuna nazioarteko bi kateen bidez, ETBSat eta Canal Vasco. ETBK Sat-ek 19:30ean eskainiko du berriro finala.
Saskibaloia, txirrindularitza eta aizkolariak
Egunak beste hainbat kirol emankizun ere ekarriko ditu. Hala, nola, 12:15ean Endesa Ligako Lagun Aro GBC-Gescrap Bizkaia partida izango da ikusgai ETB-1en eta 15:25ean Romandiako Tourreko azken etapa ETBK Sat-en.
16:00etan, herri kirolaren ohiko tartean, aizkolarien Eusko Label Sariko 5. jardunaldian gertatutakoak bilduko dituzte ETB-1en eta futbol jardunaldiaren errepasoa 'Gol Festa' (19:30, ETB-1) eta 'Tribuna Gol' (22:30, ETBK Sat) saioek egingo dute.
