Mikel Aranbururi eskainitako saio berezia, igandean, ETB-1en

Igande goizean, Euskal Telebistak Mikel Aranburu Realeko jokalariari saio berezia eskainiko dio 12:15etik aurrera, bezperan esango baitio agur bere futbol ibilbideari. Realak At. Madrilen aurka jokatutako partida eta azpeitiarrari buruzko erreportajea eskainiko dira. Mikel Aranburu, Realaren bihotza lana Igor Sarriegik eta Loiola Altunak ekoiztu dute. Bertan, jokalari txuriurdinaren futbol ibilbidea errepasatuko dute, baita bezperako agurreko irudiak bildu ere.

Eguerdi partean, Italiako Giroarekin bat egingo du Euskal Telebistak, 14:30etik aurrera ETBK Sat-en eta 14:55ean ETB-1en. Fermin Aramendik eta Xabier Usabiagak emango dute zortzigarren etaparen berri zuzenean: Sulmona eta Lago Lacemoren arteko etapa da eta 229 kilometro ditu.

Ondoren, Eibarko pilotalekuarekin bat egingo dute ETB-1eko kamerek eta bertan jokatuko den pilota jaialdiaren berri emango dute, 17:00etatik aurrera. Lehenengo partidak Olazabal-Laskurain eta Gorka-Zubieta bikoteak jarriko ditu aurrez aurre eta ondoren, banakako txapelketa partidak eskainiko dira. Hasteko, lehengo mailakoa, Irujo-Barriola, eta, ondoren, bigarren mailakoa, Lemuno-Zabaleta. Xabier Euzkitze, Joxan Tolosa eta Elena Azpeitiak egingo dute kontakizuna.

Gaueko hamarretan, 'Gol Festa' saio berezia aurkeztuko du Mikel Olazabalek. Lehen Mailako ligako azken jardunaldiaren azterketa sakona egingo dute bertan.

Bigarren mailako futbola, ETBK Sat-en

ETBK Sat kateak, bere aldetik, Bigarren B Mailako futbol partidak arretaz jarraituko ditu. Arratsaldeko 18:00etan, Lemoa eta Amorebieta taldeek jokatuko duten norgehiagoka eskainiko da zuzenean, Xabier Andueza eta Juanan Larrañaga komentaristen eskutik. Emanaldian zehar, zuzeneko konexioak egingo dira Gimnastika eta Alavesek ordu berean jokatuko duten partidarekin. Torrelavegatik, Joseba Urkiola kazetaria izango da berriemaile.