Aulki Jokoa
22:30ean
Binaka jolastuko dira 'Aulki-jokoa' saioan, gaur
A.E.|EiTB
Iruñeko bertsoaldi onenak aztertuko ditu Andoni Egañak.
Informazio gehiago (1)
Binakako jolasa izan ohi da bertsolaritza, baina bakarkako lanak geratu ohi zaizkigu Txapelketaren oroimenean. Zer du bertsolaritzak binakakotik eta zer banakotik? Galdera horren bueltan dator gaur gaueko 'Aulki-jokoa', 22:30ean, ETB1en.
Kronikak, elkarrizketak, erreportajeak... Handia da Txapelketa Nagusiaren bueltan egiten den kazetari-lana. Saio hasieran hasten dira kazetarien buruak eta hatzak lanean, eta saioa amaitutakoan ia azkenak izaten dira etxera joaten. Amagoia Mujika da Txapelketa Nagusiaren jarraipena egiten duen kazetarietako bat, eta berarekin egongo da Edurne Azkarate Iruñeko saioan. Ea zer titular jartzen dion azken finalaurrekoari!
Txapelketa Nagusian saioz saio dabiltzan bertsozaleek kilometro asko egiten dituzte kotxean. Kristina Mardarasek eta Justo Alberdik Euskal Herria zeharkatu dute udazken honetan. Bertsolariak eta bertsozaleak dira biak: Kristina Mardaras izan zen Txapelketa Nagusian parte hartu zuen lehen emakumea eta Justo Alberdi izan du urte horietan guztietan bertsotan lagun eta bizikide. Kotxeko orduak kantuan egiten dituzte eta horrek asko errazten die bidea.
Atzera begira jarrita, 1991ra joango gara Iñaki Muruarekin. Bertsotan asko erabili izan den 'Baserrian jaio nintzen' doinua plazaratu zuen Xabier Leteren 'Habanera' abestian oinarrituta. Iñaki Muruak berak kontatuko digu nola moldatu zuen abestia eta nola plazaratu zuen. Juantxo Zeberiok jatorrizko kantua eta bertso-doinua aztertuko ditu pianoa lagun, eta Miren Amurizak 2009ko bertso batzuk ekarriko dizkigu, Fredi Paiarekin Laudion osatutako ofizioa.
Iruñeko bertsoaldi onenak, Andoni Egañak hautatuta
Larunbatean Iruñean jokatu zen Txapelketa Nagusiko azken finalaurrekoa. Aitor Mendiluze, Aitor Sarriegi, Alaia Martin, Miren Amuriza, Oihana Iguaran eta Unai Agirre ari ziren kantuan, eta saioaren balorazioa egingo du astelehenean Andoni Egañak Edurne Azkaraterekin batera.
'Aulki-jokoa', gaur gauean, 22:30ean, eitb.eus-en eta ETB1en.
en.