Bago!az
Casting deialdia
Martxan da 'Bago!az' saioan parte hartzeko castinga!
A.A. | EITB
Iholdi Beristainek eta Maria Redondok ere casting prozesua pasatu, lehiaketan parte hartu eta irabazi egin zuten, eta 'Go!azen' telesaileko aktore dira gaur egun.
Informazio gehiago (1)
'BaGo!az' saioko lantaldea hasi da 2019ko edizioa prestatzen, eta lehen lanetako bat lehiakideak bilatzea izango da. Horretarako, casting deialdia zabaldu dute. Abesten badakizu eta telebistako saio batean parte hartu nahi baduzu, hau da zure saioa! Gainera, 'Go!azen' telesailaren hurrengo denboraldiko aktoreetako bat izatea ere lor dezakezu.
Iholdi Beristainek eta Maria Redondok, 'BaGo!az' saioko azken bi irabazleek, lortu zuten. ETB1eko lehiaketako irabazle izendatu zituzten, eta paper bana daukate 'Go!azen' telesailean. Biek ala biek casting prozesua gainditu behar izan zuten lehendabizi, primerako castingak eginez gainera.
Hau da Maria Redondok iaz egin zuen castinga:
Lehen edizioko garaile izan zen Iholdi Beristainek, berriz, honela egin zuen:
Maitane Lopategik ere, 'BaGo!az'en lehen edizioan hartu zuen parte, eta webgunera bidali zuen bere bideoa. Ondoren, '3zpa4' saioko aktore izatea lortu zuen eta ETB1eko haurren saioan lanean dabil gaur egun.
ETB1eko lehiaketan parte hartu ondoren, ibilbide profesionalari ekiteko aukera izan duten hiru adibide ditugu horiek.
Gogoratu 'BaGo!az'en parte hartzeko ongi kantatu behar dela, baina, horrekin batera, oso garrantzitsua da abestia behar bezala interpretatzen jakitea. Izan ere, lehiaketa honetako irabazlea 'Go!azen' telesaileko denboraldi berriko aktoreetako bat izango da.
16 eta 23 urte arteko gazteei zuzendutako castinga da hau. Baldintza horiek betetzen badituzu eta 'Bago!az'eko izarretako bat izan nahi baduzu, graba ezazu bideo bat zeure burua aurkeztuz eta nola abesten duzun erakutsiz, eta igo webgunean aurkituko duzun formularioaren bidez. Gogoan izan casting-bideo hauek EiTBren edozein euskarritan erakutsi ahal izango direla, hala erabakitzen bada. Hori dela eta, horizontalean grabatuta egon behar dute, eta hauetako formaturen bat izan behar dute: avi, mov, mp4, flv, mpeg, 3gp edota mkv.
Informazio gehiago, bagoaz@eitb.eus helbidean eta 943 01 16 74 telefono-zenbakian.
Egin Mariak, Iholdik eta Maitanek bezala! Hartu parte casting prozesuan zure bideoa bidaliz!
