Sebastian Gonzalez pilotari ohia izango da gaurko gonbidatua 'Gure Kasa'n

Gaur gauean, Sebastian Gonzalez pilotari ohia izango dute 'Gure Kasa' saioan gonbidatu. Pilota profesionala utzi zuela sei urte pasa dira, eta hitzorduan zehar, bere ibilbidea, irabazitako txapelketak eta bizi izan zituen polemikak hartuko ditu hizpide.

Nerea Aliasek gonbidatuaren irudi bitxiak topatu ditu artxiboan eta Nahiara Gagok pilotarekin zerikusia duen jolas bat ekarriko du. Bestalde, Aitor Frantsesena Beñat Lizasorekin izango da. Hamaika urterekin istripu bat izan eta hanka bat galdu zuen Lizasok. Berarekin, trinketean aritu dira.

Amaitzeko, Iban Garciak Mieltxo Saralegi harri-jasotzaileari saiora etortzeko gonbidapena emango dio. Lortu ote du berarekin egotea?

'Gure Kasa' astelehenetik ostegunera izaten da ikusgai, 21:30ean, ETB1en eta eitb.eus-en.