Finala hizpide eta Andrea eta Duque gonbidatu, gaur gauean, "El Conquis"en

Uztailaren 5ean "El Conquistador del Fin del Mundo" abenturaren final handia ospatuko da. Finalaren atarian, Mikel konkistatzaile eta konkistologoak azken xehetasunak lehen lerrotik eskainiko ditu, eta Dominikar Errepublikarekin hainbat konexio egingo dituzte. Horrez gain, ekitaldi nagusiaren lehen irudiak eskainiko dituzte esklusiban gaurko saioan.

Bestalde, kanporatutako azken bi lehiakideak, Duque eta Andrea, hartuko dituzte platoan. Duqueren kasuan, Cacata taldearekin izandako negoziazio guztiek ez zioten balio izan Aitorren izendapena saihesteko. Andreak, ordea, ez zuen zorte handirik izan eta immunitate jokoan huts egin zuen. Eztabaidara hainbat fronte irekita iritsiko dira biak. Atabey taldekide batzuekin elkartuko da Andrea platoan, eta edizio honetan gehien espero den norgehiagoka ikusi ahal izango da: Andrearen eta Begoren artekoa.

Horrez gain, bosgarren finalista izendatu ostean Nahiak egindako lehen adierazpenak entzuteko aukera izango du saioak. Nafarra lau duelurekin iritsi da finalera, Mikelek iaz izan zituen berberekin.

Saioak Isa, Jenny, Durana, Nakor, David, Eneko, Manu eta Seleta conquistologoak hartuko ditu platoan. Berebat, Conquis komunitateko kide eta jarraitzaileen iruzkinak ere bilduko dituzte Gaztearen txokoan, Oizeder Mayo eta Isma Pereiraren eskutik. EiTBren webgunean ere gehien gustatzen zaizkizuen parte-hartzaileen alde bozkatu ahal izango da. Uztailaren 7an ikusleen faboritoaren gala ospatuko da, eta azken boto hauek erabakigarriak izango dira irabazlea erabakitzeko.

"El Conquis" eztabaida saioa asteazkenetan izaten da ikusgai, 22:30ean, ETB2n eta eitb.eus-en.