Saskibaloiko Euskal Kopako finala zuzenean ETB-1en

Ostiralean, Gescrap Bizkaia eta Caja Laboral taldeek saskibaloiko Euskal Kopa finala jokatuko dute Bilbao Arena pabilioian eta Euskal Telebistak zuzenean eskainiko du norgehiagoka ETB-1en eta eitb.com-en. Asier Aranguren, Josean Aldalur eta Juan de la Vega komentaristek emango dute emanaldiaren berri arratsaldeko 20:15etik aurrera.

Banakako pilota Txapelketa

Ondoren, 22:00etatik aurrera, Santo Domingoko pilota jaialdian jokatuko diren partidak eskainiko dira ETB-1en. Hasteko, Xala- Merino eta Titin III- Cecilio bikoteen arteko norgehiagoka eskainiko da eta ondoren, banakako txapelketa partida jokatuko dute Olaizola I eta Aritz Lasak. Xabier Euzkitze, Josean Tolosa eta Koldo Aldalur izango dira emanaldiaren berri emateko arduradunak.

Italiako Giroaren seigarren etapa

Horrez gain, ETB-1eko kamerek, arratsaldero bezala, Italiako Giroarekin bat egingo dute 15:00etatik aurrera. Ostiralean, Giroaren seigarren etapari aurre egin beharko diote txirrindulariek; Urbino eta Porto de Saint' Elpidioren arteko 206 kilometroko etapari, hain zuzen. Xabier Usabiagak eta Fermin Aramendik egingo dute etaparen gaineko kontakizuna eta eitb.com-en ere ikusgai izango da.