140 km/h-rainoko haize-boladak izan ditugu mendiko zenbait puntutan

Erredakzioa

Azken eguneratzea: 2010/02/25 21:19 (UTC+1)

Oiz mendian eta Karrantzan (Bizkaia) izan dira haize-ufada indartsuenak. Denboralearen ondorioz, zuhaitz bat erori da Amorebietan eta 2.800 auzokide hornidura elektriko barik geratu dira.

Orria entzun Orria entzun

Whatsapp
Whatsapp
telegram
twitt
Bidali
Esteka kopiatu

Bideoak (1)

Alerta laranja EAEn, haizeagatik

Arratsalde partean haizea baretu da EAEn. Izan ere, alerta maila laranjatik maila horira jaitsi du Eusko Jaurlaritzaren Herrizaingo Sailak. Gauetik aurera, aurreko egunetan bezala, ufadek 80 km/h-ko abiadura har lezakete EAE osoan; mendateetan eta itsasaldean, 100 km/h baino gehiagoko boladak jaso litezke.

Herrizaingok jakitera eman duenez, Oizen eta Karrantzan izan dira gaurko haize-bolada indartsuenak, 139 km/h-ko eta 143 km/h-ko, hurrenez hurren. Bestalde, haize zakarrena izan duen hiriburua Gasteiz izan da, 109 km/h-rainoko abiadura, radarrak goizean jaso dutenen arabera.

Haizea dela eta, hornidura elektriko gabe geratu dira 2.800 auzokide Amorebietan, zuhaitz baten erorketaren ondorioz. Iberdrola enpresaren teknikariak konpontzen aritu dira eta gaueko 22:00ak baino lehen hornidura berrezarriko dutela jakinarazi dute.

Bestelako arazoak izan dira egunean zehar. Goiza partean eta haizearen eraginez, zuhaitz batzuk erori dira Gasteizen. Horren ondorioz, suhiltzaileek zenbait irteera egin behar izan dituzte. Gainera, eraikin baten teila batzuen askatzeak kalea sokez inguratzea eragin du. Donostian, bestalde, Pasealeku Berria eta Urgull eta Aiete parkeak itxi dituzte.

Nafarroan, haizea dela eta, AEMET Estatuko Meteorologia Agentziak abisu horia izango du ezarrita; izan ere, 80 km/h-ko boladak daude iragarrita Pirinioetan. Halaber, elur-jausiak egiteko arriskua egongo da alde horretan, eta beste abisu hori bat dago horregatik.

Herrizaingo Sailak eman dituen gomendioen artean, errepidean arretarik handiena izatea agertzen da; kontsultatu trafikoa.

Ostiralean, Euskalmeten eguraldi iragarpenaren arabera, haizea nabarmen baretuko da eguerditik aurrera. Eguna haize-bolada zakarrekin hasiko dugu, baina goizean zehar haizea apurka-apurka ahulduko da, eta gainerako orduetan ahul-bizi ibiliko da. Zeruan hodeiak eta ostarteak tartekatuko dira, eta gauean erdi mailako hodei eta goi-hodeiak ugarituko joango dira. Termometroak behera egingo du egunean zehar; maximoak kostaldean 15 ºC-tik hurbil geratuko dira, eta 10-12 ºC-ren artean barnealdean.

Larunbaterako, aldiz, haizete handia du iragarrita Euskalmetek. Haizea indartu egingo da, eta egunaren bigarren partean bolada bortitzak espero ditugu; ufadarik handienek 100 km/h-ko abiadura gaindituko dute orokorrean. Zeruan hodeiak nagusituko dira, eta euri txikia egingo du; gauean, atertzeko joera hartuko du. Tenperaturak gora egingo du nabarmen, hego haizeari esker.