Maketa Lehiaketa
Maketa Lehiaketa
30. Maketa Lehiaketaren finala, gaur gauean, Bilboko Kafe Antzokian
B. F. | EITB Media
21:00etatik hasita, Mirua, Sara Azurza, Silitia eta Udda musikariek zuzenekoa eskainiko dute. Final osoa streaming bidez izango da ikusgai, eitb.eus-en eta Gaztearen Youtubeko kanalean.
-
Empty Files taldea, Gaztearen Maketa Lehiaketako finalean. EITB Mediaren artxiboko irudia
Gaztearen 30. Maketa Lehiaketako final handia gaur gauean izango da, Bilboko Kafe Antzokian. Mirua, Sara Azurza, Silitia eta Udda taldeak eta artistak lehiatuko dira bertan, eta Julen Idigoras, Izaro Andres eta Josu Billelabeitiak osatutako epaimahaiak aurtengo irabazlea erabakiko du.
Epaimahaiak eta Gaztearen entzuleek aukeratutako lau finalistek zuzenekoak eskainiko dituzte Kafe Antzokira bertaratzen direnentzat eta etxetik ikusi nahi dutenentzat; izan ere, finala Gaztearen Youtubeko kanalean eta eitb.eus-en izango da ikusgai, streaming bidez, zuzenean.
Ainhoa Vitoriak eta Xabin Fernandezek aurkeztuko dute ekitaldia. 21:00etan hasi eta gauerdira arte iraungo du, eta sarrera librea izango da, edukiera bete arte.
Finalistak
Maitanek, Malentxok eta Mattinek osatzen dute hirukoa. Aspaldiko lagunak dira, eta auren logeletan sortu dituzte Maketa Lehiaketara aurkeztu dituzten abestiak. Ahotsa eta soinu elektronikoak uztartzen ditu talde tolosarrak.
Xabier Barrutiak (gitarrak, baxua, bateria eta teklatua) eta Ibai Silicatok (ahotsa eta perkusioa) osatzen dute Silitia bikoa.
Rocketik, popetik eta elektronikatik edaten du taldeak, egiten duten musika sailkaezina dela dioten arren. Oro har, inprobisatzea eta dantzatzea gustatzen zaie.
Neosoul estiloa jorratzen du Sara Azurza donostiarrak. Bakarkako proiektu bat den arren, Sara ez dator bakarrik, Igone Zarate (gitarra), Iker Lauroba (pianoa), Haritz Lauroba (bateria) eta Txiki (baxua) lagun dituela arituko baita.
Aitor Armentiaren izen artistikoa da Udda. 20 urteko musikari gasteiztarrak "En las nubes" izeneko diskoa publikatu zuen 2021eko uztailean.
Sariak
Epaimahaiaren saria jasotzen duenak 5.000 euroko saria irabazi eta Bilbao BBK Live jaialdian jotzeko aukera izango du. GazteBizHitza Sariak, ostera, 2.500 euro emango dizkio irabazleari.
Gaztearen lehiaketarik ezagunenak 30 urte bete dituen honetan, gainera, garaikur berezi batekin gatoz: Harrobia Saria. Oso Polita diskoetxeak 4 abestiko EP bat grabatzeko aukera emango dio Maketa Lehiaketara aurkeztu den taldeetako bati. Sari horren irabazlea finalaren egunean bertan emango dute jakitera.
