Arratek 'maitasunez' esan die agur Iboni eta Seletari

Mundu guztiak espero zuen Arratek gehiago ematea karameluzko sarearen dueluan, behintzat indarra erakustea. Dena den, batek daki presioagatik ala Ibonekin eta Seletarekin kanpamentuan izandako eztabaiden ondorioz ahulduta dagoelako izan den, Arratek amore emanda hasi du duelua. Ukaezina da Andonik ahaleginak egin dituela, baina dueluan ez du areriorik izan eta ia-ia ibilaldi bat izan da berarentzat. Ondorioz, iragarpen guztien kontra, argizko izakiak abenturan jarraitzen du "El Conquistador del Pacífico" saioaren 9. atalean.

Proban axolagabekeria azaldu duen arren, joan aurretik gogoz kritikatu du bere taldea gasteiztarrak eta egin duen erradiografia ez da batere pozgarria izan. Gogoratu dezagun gorriek 5 aste daramazkiela probarik irabazi gabe. Besteak beste, Arratek esan du taldean Ibonek agintzen duela eta Seleta gehiago dela lehiakidea kapitaina baino. Manu onik atera da, baina Arratek berretsi du taldetik baztertuta dagoela.

Arratek dioena egia ala gezurra den beraiek bakarrik dakite. Taldean komodinak bukatzen ari dira eta, garaipenik heltzen ez bada, senideen arteko gerra izango dute.

Urdinek hondamendia saihesten jarraitzen dute eta aurrera doaz apurka-apurka, hasieran inork beraien alde apustu egiten ez zuen arren. Azkenean egia izango da hobe dela gutxi izatea eta elkarren artean ongi moldatzea (edo erdi ongi, kasu honetan) asko izatea baino.

Berdeek arrakastatsu jarraitzen dute eta hitz onak baino ez daude beraientzat. Oraingoz ezin da ukatu beraien nagusitasuna, eta Nagore kapitainak dio gizentzen ari dela hainbeste sarirekin. Egia esan, hamsterren esferen jokoan berriz erakutsi dute ondoen koordinatutako taldea osatzen dutela, baina badakigu "El Conquis"en gauzak berehala alda daitezkeela...

Ez ezazu galdu "El Conquistador del Pacífico", astelehenetan, 22:30ean, ETB2n eta eitb.eus-en. Gainera, saioaren atalak EiTB Nahieranen ikus daitezke.