"Vascos por el Mundo" saioa Liman izango da gaur gauean

Gaurko "Vascos por el Mundo" saioan, Pedro Mardones kazetariak eta Joan Vinos kamerariak Lima ezagutuko dute. Peruko hiriburua Pazifikoko Perla ezizenaz ezagutzen dute, eta hiriko sekretu guztiak ezagutuko dituzte bertan bizi diren Maider, David, Izaro, Gonzalo, Idoia eta Bastien euskaldunen eskutik.

Lima, itsasora begira dagoen hiria, munduko surfaren tenpluetako bat da. Hiriko kostaldean, bioaniztasun handia dago: ehunka hegazti mota eta Humboldteko pinguinoak ikus daitezke. Gainera, itsas lehoiekin igeri egiteko aukera izango dute Palomino uharteen inguruan.

Hiriko ikurretako bat Limako Plaza Nagusia da. Francisco Pizarrok eraiki zuen, 1515ean, eta oraindik ere bere esentzia koloniala mantentzen du. Pizarroren aurretik, hainbat kultura eta zibilizazioren bizitokia izan zen Lima, Pachacamac milaka urteko tenpluak erakusten duen bezala.

Bidaian zehar hiriko tokirik ezagunenak bisitatuko dituzte; Barranco auzoa, hiriko erdigune historikoa eta Mirafloreseko hondartza ederrak, besteak beste.

Amaitzeko, Ica eskualdean egongo dira. Bertan, Huacachina urmaelean igeri egingo dute eta buggy batean ibiliko dira basamortuko dunetan barrena.

"Vascos por el Mundo" ostegunetan izaten da ikusgai, 22:30ean, ETB2n eta eitb.eus-en.