Euskal Bizikletako etapak, aste honetako txirrindularitza tartean

Duela urte batzuk desagertu zen Euskal Bizikleta lasterketari eskainiko diote datorren asteko txirrindularitza tartea. Zaleen artean une gogoangarriak utzi zituen Eibarko txirrindularitza probak, eta horiek berriz ikusteko aukera izango dute ikus-entzuleek. Ohi denez, 15:40 aldera hasiko dira emanaldiak, aste barruan "Txoriene" eta larunbatean "Arte[faktua]" amaitutakoan, ETB1en eta eitb.eus-en.

Euskal txirrindularien eta nazioarteko izarren topagune izan ohi zen Euskal Bizikleta. Ostiralean, euskaldunak nagusi izan ziren 1999ko Euskal Bizikletaz gozatzeko aukera izango dugu, David Etxebarria eta Unai Osa nabarmendu baitziren. 

Azkenik, larunbatean, 2000. urtera egingo dugu jauzi. Hori ere euskaldunen urtea izan zen: Haimar Zubeldiak lortu zuen garaipena, eta Igor Gonzalez de Galdeano eta David Etxebarria izan zituen podiumean ondoan.