Gazte justizia izango du hizpide, gaur gauean, "Aquí y Ahora" saioak

Gaur gauean, "Aquí y Ahora" saioa adin txikikoentzako itxialdi-zentroak izango ditu hizpide. Eider Hurtadok gidatutako saioak, instalazioak eta adingabeen perfila nolakoa den emango du ezagutzera. Errealitate honetan sakontzeko, Ibaiondoko adingabeen zentroan (Zumarraga) sartuko den lehen saioa izango da ostegunekoa. Bertan nola lan egiten duten ikusi eta protagonistekin hitz egingo dute. Gazteon istorioa erdigunera ekarrita, lehen mailako zentro batean sartzeak eurentzat zer suposatu duen kontatuko dute. Nerea Reparazek aditzera emango duenez, gazte justiziaren mailarik murriztaileenak 950 neurri ezartzen ditu urtean Euskadin.

Gazte Justiziako Hezkuntza Zentroen Sare barruan dago Ibaiondo. Justizia mota hori egituratuta dago delituzko jokabide baten erantzule diren 14-18 urteko neska-mutilei gizarte eta hezkuntza ikuspegiarekin erantzuteko. Honen harira, Patxi Lopez zerbitzuburuak sakonago azalduko du gazteek eta langileek bizi duten egoera.

Bestalde, Eduardo Cabrerak, Berriztu elkarteko kidea, azken urteotan indar handiz azaleratu diren bi joeren inguruan arituko da: gurasoen aurkako indarkeriaren eta adingabeen arteko genero indarkeriaren kudeaketari buruz.

Horrez gain, gazteen justizia zentroetatik pasatzen diren adingabeen profila aztertuko dute. Estefania Ocariz Kriminologiaren Euskal Institutuko ikertzailearen eskutik, jokabide mota horretarako arrisku-aldagaiak zeintzuk diren ezagutuko dituzte, eta gazte-justiziaren kasu larrienetan ere sakonduko dute. Delitu horiek oso ohikoak ez diren arren, gizartean zirrara handia eragiten dute, eta gaur egun zigor-adinari buruzko eztabaidak planteatzen dituzte eta 14 urteko zigorra. Gai honen inguruan ere Monica Arias Bizkaiko adingabeen fiskal nagusia ere elkarrizketatuko dute.

Azkenik, programak gazte-justiziaren bi alderdi garrantzitsu aztertuko ditu: erregimen irekiko neurriak eta eragindako kaltearen ordaina. Alde batetik, gizarte eta hezkuntza zereginak ezartzen dira, gazteak gizarteratzeko eta lan-gaitasunak eskaintzeko. Bestetik, biktima inplikatzen duen justizia leheneratzaileko prozesu batean parte hartzera gonbidatzen dituzte, adingabearen enpatia sustatuz.

Gazte justizia izango du ardatz gaur, 22:30ean, ETB2n eta eitb.eus-en "Aquí y Ahora" saioak eskainiko duen erreportajeak.