Mutilen protestak, Odin eta Leire, gaurko protagonistak "El Conquis" saioan

Mutilen protestak, Leire eta, nola ez, Odin izango dira protagonistak gaurko "El Conquis" debatean, 22:30etik aurrera ETB2n eta eitb.eus-en. Oraingoan ere, arrakastatsu hasi du astea saioak, "El Conquistador del Caribe" liderra izan baitzen berriz ere asteleheneko ordutegi nagusian, % 25,0ko kuota eta 343.000 ikus-entzuleko audientzia metatuarekin; asteazkenean, atal horretan gertatutako guztia aztertzeko aukera izango da, zuzenean, platotik.

Mutilak iritsi dira Karibera, eta heldu berritan jada lehen hautaketa egin dute. Hamabi taldekidek Odin izendatu zuten eta dueluak gainerakoa egin zuen; gasteiztarra minduta dago mutilekin, bereziki Punkyrekin. Egoeraz eta mutilen taldeaz hitz egiteko asmoarekin iritsiko da Odin debatera; izan ere, indartsu ikusten ditu, baina elkarbizitzan gatazka sortzeko aukera askorekin. Mutilen lehen gauaren irudi esklusiboak eskainiko dituzte saioan eta, Odinek berak aurreratu bezala, lehiakideetako batzuk jada urduri jarri direla ikusiko dugu. Heldu eta ordu gutxira haserre eta kexaka hasi dira haietako bi.

Neskek, berriz, bigarren gauari egin behar izan diote aurre. Igandeko atalean bere onetik aterata ikusi genuen Leire, hotza eta ziztadak direla-eta. Gaurko debatean eszena osoa erakutsiko dute, eta ikusteko dago zein aldarterekin esnatuko den Leire biharamunean.

Nesken zein mutilen taldeetara albiste on bat ere iritsiko da: korreoa. Berau nola jasotzen duten eta lehia berri baterako euren burua nola prestatzen duten aztertuko dute: Taldeka lehiatuko dira? Denak denen kontra? Immunitate jokoaren lehen irudiak ikusgai izango dira gaur gauean.

Platoan, nola ez, conquistologoak izango dituzte: Eneko, David, Mikel, Durana, Leire Juanes, Juanito eta Joana; audientziak ere izango du zer esana, Gaztearen txokoan, Oizeder Mayo eta Isma Pereirarekin. Aurrerantzean, gainera, Conquis Komunitateak misio garrantzitsu bat izango du: Odinen abentura gainditutzat eman ala kale egin duen erabaki, botoen bidez.

Mutilen zein nesken ikusi gabeko irudiak, immunitate joko berria eta Odin kaleratu berriari epaiketa, gaur gauean, "El Conquis" debatean, 22:30etik aurrera ETB2n eta eitb.eus-en.