"Ahoz Aho" bueltan da, astelehenetik ostiralera, ETB1en eta eitb.eus-en

Urtarrilean egindako geldialdiaren ondoren, Ilaski Serranok aurkeztutako "Ahoz Aho" saioa berriz ikusgai, ETB1en eta eitb.eus-en. Informazioa, dibulgazioa, elkarrizketak, zientzia gaiak, teknologia berriak, musika, literatura, euskalgintza, feminismoa eta kultura landuko ditu saioak. Horretarako, une honetan Euskal Herrian sortze lanetan, ikerketan eta proiektu ezberdinetan lanean dabiltzan gonbidatuak izango ditu saioak, egunerokotasunean gertatzen denari testuinguru zabala jartzen.

Astelehen honetan, Anartz Ormaza arkitektoak hil berri de Ricardo Bofil arkitekto katalan ezagunaren biografia eta obra hurbilduko ditu. Bestalde, Ilaski Serranok Asier Amondo Korrikaren arduraduna elkarrizketatuko du eta, hitzorduan zehar, aurtengo ibilbidearen nondik norakoak eta estreinatu berri den dokumentalaz arituko dira, besteak beste.

Eider Rodriguez idazlearekin Eraikuntzarako materiala liburuaz ariko dira asteartean. Gainera, "Abiapuntua" saioko aurkezlea den Xabier Madariaga kazetaria eta teknologia berrietan aditua den Maite Goñi irakaslea ere izango ditu Ilaskik saioan.

Asteazkenetan, gaurkotasunaren gainbegirada egingo dute Pilar Kaltzada eta Iñaki Galdosekin. Aurretik, Erre proiektuaz hitzegitera etorriko dira Haizea Arana eta Aner Peritz sortzaile gazteak.

Ostegunean, Ibon Fernandez Gazteako lankidearen eskutik musika albisteak ekarriko dituzte. Gainera, Imanol Ituño magoa ere izango da platoan, eta zientzia gaiak Ana Galarragarekin landuko dituzte.

Ostiralean, zineaz arituko da Aitor Abaroa eta Gaizka Izagirrerekin. Gorka Hermosa soinu jotzailea izango da gonbidatua eta kirol kontuei ere tartea egingo die Ilaskik Jon Balentziaga lankidearekin.

Kultur mahaiak, nutrizionisten aholkuak, geologia gaiak, gonbidatu ezagunak eta zuzeneko musika ere izango dute hurrengo saioetan. Besteak beste, Itziar Ugarte eta Irati Jimenez idazleak, Mikel Urdangarin, Nerea Ibarzabal, Kaotiko eta Dientes de Luna musika taldeak izango dira "Ahoz Aho" saioan gonbidatu datozen egunetan.

"Ahoz Aho" astelehenetik ostiralera izango da ikusgai 15:45etik aurrera ETB1en eta eitb.eus-en.