Berandu baino lehen
Gaur, 22:15ean
Iñaki Goirizelaia eta Aitziber Garmendia, 'Berandu Baino Lehen' saioan
A.E.|EiTB
Donostian izango da Fermin Etxegoien aktorearekin, eta Leioako Campusean, EHUko errektorearekin.
Informazio gehiago (1)
Iñaki Goirizelaia eta Aitziber Garmendia elkarrizketatuko dituzte gaur gauean 'Berandu Baino Lehen' saioan. Aitziber Garmendia aktorea Donostiako Tabakaleran elkartuko da Fermin Etxegoienekin, bertan baitago Uda gau bateko ametsa prestatzen. Kristina-Enea parketik gora eta behera dabiltzan bitartean, egun hauetan bertan egiten ari den Shakespeareren obra ikusgarriari buruz hitz egingo digu Garmendiak.
Horretaz aparte, bere profesioan emandako lehenengo pausoak gogoratuko ditu, baita anekdota batzuk kontatu ere.
Horren ostean, Euskal Herriko Unibertsitatearen Leioako Campusera egingo du salto programak. Iñaki Goirizelaia errektorea elkarrizketatuko du Fermin Etxegoienek arratsalde haizetsu batean. Goirizelaiak bere bulegoa erakutsiko digu eta Unibertsitateko funtzionamenduaren arlo ezezagunak kontatuko dizkigu. Instituzio honen pozak eta ajeak aipatuko ditu, baita kontu pertsonal batzuk komentatu ere.
'Berandu Baino Lehen' astearteetan izaten da ikusgai, 22:15ean, ETB1en eta eitb.eus-en.
