Mikel Moreno abeslaria, gaur arratsaldean, "Biba Zuek!" saioan

Mikel Moreno abeslaria izango dute gonbidatu gaurko "Biba Zuek!" saioan. Esnatu baino lehen bere lehendabiziko bakarkako diskoa kaleratu du andoaindarrak, eta bertan bildu dituen kantak aurkeztuko ditu. Horrez gain, bere musika ibilbidean hainbesteko garrantzia izan zuen Kauta taldean bizitako esperientziak ere gogoratuko ditu Maddalen Arzallusekin eta Xabier Sukiarekin.

Lehendabiziko orduan, berriz, bizimodu aldaketa egitea erabaki duten bi lagunen testigantzak jasoko dituzte. Argazkilari bizimodua alde batera utzi eta belaontzian turistentzako egonaldi bidaiak eskaintzen ditu Xabi Urrestik Formenteran eta Eivissan. Marta Perezek, aldiz, ordura arteko bizimodua errotik aldatu eta Egozkuen familiak izan duen gaztandegia du gaur egun bizibide. Bien istorioak ezagutuko dituzte.

"Biba Zuek!" 18:00etatik 20:00etara dago ikusgai, ETB1en eta eitb.eus-en.