Iruñerriko Uharte Zentroan izango da 'EiTB Kultura' gaur gauean

Uharte Zentroa ezagutzeko parada izango dugu, gaur gauean, 'EiTB Kultura' saioan. Iruñerrian dago kokatua, eta duela hiru urtetik sormenerako espazioa da. Diziplina ezberdinetan ari diren artistekin izan dira bertan, baita zentroaren ereduaz hitz egin duten zuzendariekin ere. 

Ostegun honetako bigarren erreportajean, Mikel Lertxundi eskultoreak Bilboko Rekalde Aretoan duen erakusketan zehar gidatuko gaitu. 

Horrez gain, Lara Izagirre zinemagilearekin hitz egingo dute 'Nora' bere azken pelikula grabatzen ari baita. 

Oier Guillan idazle eta antzerkigilearen kultur gomendioekin osatuko da aste honetako programa. Metrokoadroka Sormen Laborategiaren egoitzan izan dira berarekin, Oiartzunen. 

'EiTB Kultura' ostegun gauetan izaten da ikusgai ETB1en, ETB2n eta eitb.eus-en. Halaber, erreportajeak banan-banan ikus daitezke asteazkenean hasi eta hurrengo asteartera bitartean iluntzeko 'Gaur Egun' albistegiaren ostean.