'Go!azen'eko neska-mutilak, larunbat honetan, Bilboko Aste Nagusian!

'Go!azen' telesaileko neska-mutilek ikuskizun bikaina eskainiko dute Bilboko Aste Nagusian. Abuztuaren 25ean, larunbatean, izango da, 18:00etan, Abandoibarra aldean jarritako agertokian.

Oraingoan, gainera, musikari lagunak izango dituzte alboan 'Go!azen Lagunekin!' izeneko ikuskizun berezi honetan: Gatibu taldeko kantari eta 'Bago!az' saioko epailea, Alex Sardui; Hesian taldeko kantari eta 'Bago!az' saioko aurkezlea, Zuriñe Hidalgo; The Uski’s taldeko abeslaria, Iñigo Eiguren; eta 'Go!azen'eko hainbat kanta sortu dituen Iker Lauroba.

Gatibu, Hesian, The Uski’s eta Lauroba taldeen hainbat abestiren bertsioak egin ditu 'Go!azen' telesailak. Musikari horiei eskerrak eman eta omentzeko, bertsio horiek entzungo dira Bilboko Aste Nagusiko emanaldi berezi honetan.