Go!azen
11. atalaren aurrerapena
Amaiaren autoarekin istripua izango dute, gaur gauean, "Go!azen"en
EiTB
Bestetik, Sarak lana galduko du eta Eiderrek burua argitzeko denbora beharko du Enekori muxua eman ondoren.
Igorrek eta lagunek Amaiaren autoa lapurtuko dute "Go!azen" telesailaren gaurko atalean, eta istripua izango dute. Horrez gainera, Sara kaleratu beharra izango du Amaiak, eta Eiderrek bere burua argitu nahiko du.
Gatibu taldeak kontzertua emango du Basakabi inguruko herri batean. Guztiek joan nahi dute ikustera, baina badakite debekatuta dutela Basakabitik ateratzea. Hori horrela, Igorrek Amaiaren autoko giltzak lortuko ditu, eta kontzertura joango da ezkutuan, Maddi, June eta Danelekin batera. Basakabiko lurretatik irten aurretik, ordea, istripua izango dute. Harrapatuko ote dituzte?
Istripua izan aurretik, Amaiak ez du oso egun erosoa izango. Sara kaleratzera behartuko dute, eta ez da erraza izango berarentzat neskari eta Musari erabakiaren berri ematea. Gainera, Aimarrek ere kontuak eskatuko dizkio, eta Sara bere amaren eskariz bota behar izan duela azaldu beharko dio. Gozoa jarriko da Aimar bere amarekin!
Saraz eta Aimarrez gainera, beste bikote bat ere bidean da Basakabin. Enekok eta Eiderrek muxu eman zioten elkarri, baina Eiderrek atzera egin zuen gero. Ez dauka oso argi bien arteko harremana abiatzeko prest dagoen ala ez.
Azkenik, Telmo ere erabat txoratuta dago Desirekin, eta afaltzera gonbidatuko du azkenean. Baina itxura txarra emateko beldur da. Moldatuko ote da?
Hori guztia, gaur gauean, 21:00etan, ETB1en eta eitb.eus atarian, eta, ondoren, baita Go!azen aplikazioan eta EiTB Nahieran atarian ere.
