En Tol Sarmiento musika taldea, gaur gauean, 'Gure Kasa' saioan

Gaur gauean, tronboiak, tronpetak, saxoa... entzuteko aukera izango dugu; izan ere, euskal talde handi baten bisita jasoko dute 'Gure Kasa'n, En Tol Sarmiento (ETS) musika taldea. Gazteak diruditen arren, guk uste baino denbora gehiago daramate musika munduan eta gero eta arrakasta handiagoa dute euskal gazteen artean. Galderei erantzun, jolastu, ondo pasatu eta zuzenean abestuko dute.

Haizea bezain bizkor etorriko da Asisko Urmeneta, errotulagailuak lanean jarri eta historia bitxiak azaltzeko bere marrazkien bidez. Ondoren, Nerea Aliasek Nerearen artxiboa zabalduko du, eta Iban Garcia sukalde kontuetan murgilduko da, amaren laguntzarekin 'Pancake challenge' bat egiteko.

'Gure Kasa' astelehenetik ostegunera izaten da ikusgai, 21:30ean, ETB1en eta eitb.eus-en.