Herri txiki, Infernu Handi
22:15ean
Zeberio, igande honetan, "Herri Txiki, Infernu Handi" saioan
EITB Media
Bizkaiko udalerria bisitatuko dute Zuhaitzek eta Pagadik eta, besteak beste, Jürgen Lange historialariarekin eta Juan Manuel Etxebarria euskaltzain urgazlearekin izango dira. Olatzen bizikleta estatikoa eta Iluminadaren oiloen kolore anitzeko arrautzak ere ez dira faltako.
Igande honetako "Herri Txiki, Infernu Handi" saioan Bizkaiko Zeberio udalerrian izango dira Mikel Pagadi eta Zuhaitz Gurrutxaga.
Jürgen Lange ezagutuko du Pagadik han, duela 30 urte Alemaniatik etorritako historialaria. Jürgenen sauna pribatuan erlaxatu eta hark etxean eginiko garagardo alemaniarra dastatuko dute elkarrekin. Pirras-ekin ere egingo du topo Zeberion. Bertako zaindari "ez-ofiziala" da Pirras, bere kataloxa eta eskopetarekin kontrolatzen baitu herria; eta txorizo-pamplona bokadilloa ez zaio inoiz falta herriko sheriff-ari. Ondoren, bokadilloak eragindako haizeentzat, Patxi Abrisketa zeberioarrak erremedio ezin hobea emango dio Pagadiri; eta Olatz Etxebarria, berriz, bizikleta estatikoarekin dagoela topatuko du. Maurizia herrikidearen hit-ak entzuten ditu Olatzek erritmoa ez jaisteko.
Zuhaitzek, berriz, Juan Manuel Etxebarria euskaltzain urgazlea ezagutuko du San Tomas eliza inguruan. Etxebarriaren esanetan, herriaren izena Severo enperadore erromatarretik dator. Gainera, elizako portikoak dituen labirinto eta bestelako sekretuak erakutsiko dizkio. Historia ikasteaz gain, goitibeheran ibiltzeko aukera ere izango du Zuhaitzek aste honetan, Jesus Mari Etxebarria eta Pili Olabarriarekin, Bertzuten auzoan. Jostailuzko kotxetxoarekin aldapa jaisten saiatuko da; baina, onik iritsiko al da behera? Iluminada Aierdi, berriz, 75 urteko zeberioarra da. Bizi osoan zehar sukaldari lanetan ibili izan da, eta Messi futbolean baino hobea omen da bera sukaldean. Iluminadaren oiloen kolore anitzeko arrautzak ere ezagutuko ditugu aste honetan. Azkenik, Lino Ayestarekin ere egongo da Zuhaitz. Soldadutzan zegoela aktore lanetan ibili zen, Cromwell pelikulan, eta grabaketak iraun zuen hilabetea, egunez filmatzen eta gauak parrandan pasatu zituzten. Linok, Zuhaitzekin batera, lehen aldiz ikusiko du filma.
"Herri Txiki, Infernu Handi: Zeberio" igande honetan izango dugu ikusgai, 22:15ean, ETB1en eta eitb.eus-en.
